സെഞ്ചുറിക്കൊപ്പം റെക്കോഡുകളും വാരിക്കൂട്ടി രോഹിത് ശർമ

ധർമ്മശാലയിൽ നടക്കുന്ന അഞ്ചാം ടെസ്റ്റിൻ്റെ രണ്ടാം ദിനം ഇംഗ്ലണ്ടിനെതിരെ ഇന്ത്യൻ നായകൻ രോഹിത് ശർമ്മ സെഞ്ച്വറി നേടി ഇന്ത്യൻ സ്കോർബോർഡിന് കരുത്തേകി. 162 പന്തിൽ 13 ബൗണ്ടറികളും മൂന്ന് സിക്‌സറുകളും അടങ്ങിയ മനോഹരമായ ഇന്നിംഗ്സാണ് ക്യാപ്റ്റൻ കാഴ്ചവച്ചത്. രോഹിതിന്റെ 12-ാം ടെസ്റ്റ് സെഞ്ചുറിയാണിത്.

💯 for Rohit Sharma! 🙌
His 12th Test ton! 👏
Talk about leading from the front 👍 👍
Follow the match ▶️ https://t.co/jnMticF6fc #TeamIndia | #INDvENG | @IDFCFIRSTBank pic.twitter.com/LNofJNw048
— BCCI (@BCCI) March 8, 2024

ധരംശാലയിൽ നേടിയ സെഞ്ചുറിയോടെ, ഇംഗ്ലണ്ടിനെതിരെ ഏറ്റവും കൂടുതൽ ടെസ്റ്റ് സെഞ്ചുറികൾ നേടിയ ഓപ്പണറെന്ന റെക്കോർഡാണ് രോഹിതിനെ തേടിയെത്തിയത്. ഇതിഹാസതാരം സുനിൽ ഗവാസ്‌കറിനൊപ്പമാണ് രോഹിത് ഈ നോട്ടം പങ്കിടുന്നത്. 4 സെഞ്ചുറികളാണ് രോഹിത് ഇംഗ്ലണ്ടിനെതിരേ നേടിയത്. 3 സെഞ്ചുറികളുമായി വിജയ് മെർച്ചൻ്റ്, മുരളി വിജയ് , കെഎൽ രാഹുൽ എന്നിവരാണ് രണ്ടാം സ്ഥാനത്ത്.

43 സെഞ്ചുറികളുമായി ഏറ്റവും കൂടുതൽ സെഞ്ച്വറി നേടിയ അന്താരാഷ്ട്ര ഓപ്പണർമാരുടെ പട്ടികയിലും രോഹിത് ഇടം നേടി. യഥാക്രമം 49, 45 സെഞ്ചുറികൾ നേടിയ ഡേവിഡ് വാർണർ , സച്ചിൻ ടെണ്ടുൽക്കർ എന്നിവർക്ക് പിന്നിൽ മൂന്നാം സ്ഥാനത്താണ് രോഹിത് ശർമ. 42 സെഞ്ച്വറിയുമായി ക്രിസ് ഗെയ്‌ലും 41 സെഞ്ച്വറിയുമായി സനത് ജയസൂര്യയും 40 സെഞ്ചുറികളുമായി മാത്യു ഹെയ്‌ഡനും രോഹിത്തിന് പിന്നാലെയുണ്ട്.

48 സെഞ്ച്വറിയുമായി നിലവിലെ കോച്ച് രാഹുൽ ദ്രാവിഡിനൊപ്പം, അന്താരാഷ്ട്ര ക്രിക്കറ്റിൽ ഏറ്റവും കൂടുതൽ സെഞ്ച്വറി നേടിയ ഇന്ത്യൻ താരങ്ങളുടെ പട്ടികയിൽ 4-ാം സ്ഥാനത്താണ് 36-കാരനായ രോഹിത്. 100 സെഞ്ചുറി നേടിയ സച്ചിനും 80 സെഞ്ച്വറി നേടിയ വിരാട് കോഹ്‌ലിയുമാണ് മുന്നിൽ.

2021-ന് ശേഷം ഇന്ത്യക്കായി ഏറ്റവും കൂടുതൽ ടെസ്റ്റ് സെഞ്ചുറികൾ നേടിയ താരങ്ങളുടെ പട്ടികയിലും ഇന്ത്യൻ നായകൻ മുന്നിലാണ്. 6 സെഞ്ചുറി നേടിയ രോഹിതിന് പിന്നിലായി, 4 സെഞ്ചുറിയുമായി ശുഭ്മാൻ ഗില്ലാണ് രണ്ടാം സ്ഥാനത്ത്. രവീന്ദ്ര ജഡേജ, യശസ്വി ജയ്‌സ്വാൾ, ഋഷഭ് പന്ത് , കെ.എൽ. രാഹുൽ എന്നിവർ 3 വീതം സെഞ്ചുറികളുമായി തൊട്ടുപിന്നിൽ.