ആലപ്പുഴ > ആലപ്പുഴ ബൈപാസിൽ ടാങ്കർലോറിയും കാറും കൂട്ടിയിടിച്ച് കാർ ഡ്രൈവർക്ക് ഗുരുതരപരിക്ക്. ബുധനാഴ്ച ഉച്ചക്ക് ഒന്നിന് കടപ്പുറം വിജയപാർക്കിനുസമീപമാണ് അപകടം ഉണ്ടായത്. എറണാകുളത്തുനിന്നും തിരുവനന്തപുരം ഭാഗത്തേക്ക് ഇന്ധനവുമായി പോയ ടാങ്കർ ലോറിയും ആലപ്പുഴയിൽനിന്ന് തൃശൂർഭാഗത്തേക്ക് പോയ കാറുമാണ് കൂട്ടിയിടിച്ചത്.
കാറോടിച്ച തൃശ്യൂർ സ്വദേശി ചാൾസിന്റെ (32) രണ്ട് കാലുകളും ഒടിഞ്ഞു. അപകടത്തിൽ കാറിന്റെ മുൻഭാഗം പൂർണമായും തകർന്നു. അഗ്നിരക്ഷാസേനാംഗങ്ങൾ ഉപകരണങ്ങളും മറ്റ് സംവിധാനങ്ങളും ഉപയോഗിച്ചാണ് ഡ്രൈവിങ് സീറ്റിൽ കുടുങ്ങിയ ചാൾസിനെ ഏറെ പണിപ്പെട്ട് പുറത്തെടുത്തത്. കാൽമുട്ടിന് താഴെ വലിയ പരിക്കേറ്റ ഇയാളെ മെഡിക്കൽകോളേജ് ആശുപത്രിയിൽ പ്രവേശിപ്പിച്ചു.
കാറിൽ ചാൾസ് മാത്രമാണുണ്ടായിരുന്നത്. ടാങ്കർലോറിയുടെ മുൻഭാഗം ഇടിയുടെ ആഘാതത്തിൽ തകർന്നെങ്കിലും ലോറിയുള്ളവർക്ക് പരിക്കില്ല. കൂട്ടിയിടിയിൽ കാറിന്റെ മുൻഭാഗത്ത് ചെറിയ തീപിടിത്തമുണ്ടായി. ഇത് രക്ഷാപ്രവർത്തനത്തെ ബാധിച്ചു. തീയണച്ചശേഷമാണ് ചാൾസിനെപുറത്ത് എത്തിച്ചത്. ചാൾസ് തീവ്രപരിചരണവിഭാഗത്തിൽ ചികിത്സയിലാണ്. അപകടത്തെതുടർന്ന് ബൈപാസിൽ ഏറെ നേരം ഗതാഗതവും തടസ്സപ്പെട്ടു.
