കോഴിക്കോട് > കേരളത്തിലെ വനിതകളുടെ സാമ്പത്തിക ശാക്തീകരണം ലക്ഷ്യമിട്ട് പ്രവർത്തിക്കുന്ന സ്ഥാപനമായ വനിത വികസന കോർപ്പറേഷൻ വനിത സംരംഭകർക്കായി പ്രദർശന വിപണന മേള സംഘടിപ്പിക്കുന്നു. വനിതകൾക്ക് വേണ്ടി പുതിയതായി ഒരു പ്രൊജക്റ്റ് കൺസൾട്ടൻസി പദ്ധതിയും കോർപ്പറേഷൻ ആരംഭിക്കുന്നുണ്ട്. സംരംഭം തുടങ്ങാൻ ആഗ്രഹിക്കുന്ന വനിതകൾക്ക് അതിന്റെ വിവിധ ഘട്ടങ്ങളിൽ ആവശ്യമായ മാർഗ്ഗ നിർദ്ദേശങ്ങൾ നൽകുകയും പ്രതിസന്ധി ഘട്ടങ്ങളിൽ സഹായം ലഭ്യമാക്കുകയുമാണ് ഈ ഏകജാലക സേവന സംവിധാനത്തിലൂടെ ലക്ഷ്യമിടുന്നത്.
ഇതിന്റെ തുടക്കമെന്ന നിലയിലാണ് 20 മുതൽ 26 വരെ കോഴിക്കോട് കടപ്പുറത്ത് എസ്കലേറ എന്ന പേരിൽ വനിത സംരംഭക പ്രദർശന വിപണന മേള സംഘടിപ്പിക്കുന്നത്. കേരളത്തിനകത്തും പുറത്തുമുള്ള 200 ലധികം സംരംഭകരുടെ സ്റ്റാളുകളും ഫുഡ് കോർട്ടും മേളയിൽ ഉണ്ടാകും. വൈകുന്നേരങ്ങളിൽ കലാ സാംസ്കാരിക പരിപാടികളും മേളയോട് അനുബന്ധിച്ച് സംഘടിപ്പിച്ചിട്ടുണ്ട്.
