ന്യൂഡൽഹി
കലാപത്തിന്റെ ഇരകൾക്ക് ആശ്വാസവും പ്രത്യാശയും പകർന്ന് അഖിലേന്ത്യ ജനാധിപത്യ മഹിളാ അസോസിയേഷൻ നേതാക്കൾ മണിപ്പുരിന്റെ വിവിധ ഭാഗങ്ങൾ സന്ദർശിച്ചു. അസോസിയേഷൻ രക്ഷാധികാരി ബൃന്ദ കാരാട്ട്, പ്രസിഡന്റ് പി കെ ശ്രീമതി, ജനറൽ സെക്രട്ടറി മറിയം ധാവ്ളെ എന്നിവരുടെ നേതൃത്വത്തിലായിരുന്നു സന്ദർശനം. കാങ്പോക്പി അഭയാർഥി ക്യാമ്പിലെ ദുരിതങ്ങൾ സംഘം കണ്ടറിഞ്ഞു. പഠനം മുടങ്ങിയതിന്റെ സങ്കടം കുട്ടികൾ പങ്കിട്ടു.
കുക്കിവിഭാഗത്തിലുള്ള രോഗികൾക്ക് ചികിത്സാ ആവശ്യങ്ങൾക്കായിപ്പോലും തലസ്ഥാനമായ ഇംഫാലിൽ എത്താനാകുന്നില്ല. ഡയാലിസിസ് ചെയ്യാൻ നാഗാലാൻഡിലും അസമിലും പോകേണ്ട സ്ഥിതിയാണ്. ഉറ്റവരെയും ഉടയവരെയും നഷ്ടപ്പെട്ടവരെ നേതാക്കൾ ആശ്വസിപ്പിച്ചു. ആക്രമണങ്ങൾക്ക് ഇരകളായ സ്ത്രീകൾക്ക് ധൈര്യം പകർന്നു. നീതി തേടിയുള്ള പോരാട്ടത്തിൽ ഒപ്പം നിൽക്കുമെന്ന് ഉറപ്പ് നൽകി.
