തിരക്കൊഴിയാതെ രാത്രിവണ്ടികൾ; മംഗലാപുരം – തിരുവനന്തപുരം വന്ദേ ഭാരത് സ്ലീപ്പർ എത്തുമോ? പ്രതീക്ഷയോടെ യാത്രക്കാർ

തിരുവനന്തപുരം: വന്ദേ ഭാരത് സ്ലീപ്പർ ട്രെയിനുകൾ വരുന്നെന്ന വാർത്ത പുറത്ത് വന്നതുമുതൽ കേരളത്തിലെ രാത്രിയാത്രാ ദുരിതത്തിന് പരിഹാരമായി വണ്ടികൾ ലഭിക്കുമെന്ന പ്രതീക്ഷയിലാണ് യാത്രക്കാർ. നിലവിൽ തിരുവന്തപുരത്ത് നിന്ന് മംഗലാപുരത്തേക്കും, തിരിച്ചും സർവീസ് നടത്തുന്ന രാത്രിവണ്ടികളിൽ ടിക്കറ്റ് ലഭിക്കാൻ പാടാണ്. അവധി ദിനങ്ങളിലെ ടിക്കറ്റ് ആഴ്ചകൾക്ക് മുന്നേ ബുക്കാകുന്ന സാഹചര്യമാണ് സംസ്ഥാനത്തുള്ളത്. ഈ സാഹചര്യത്തിൽ സെമി ഹൈസ്പീഡ് ട്രെയിൻ എത്തിയാൽ അതിനു മികച്ച പ്രതികരണം ലഭിക്കുമെന്ന് ഉറപ്പാണ്. കേരളത്തിൽ നിലവിൽ സർവീസ് നടത്തുന്ന വന്ദേ ഭാരത് രാജ്യത്ത് തന്നെ ഏറ്റവും തിരക്കേറിയ വന്ദേ ഭാരതാണ്. ഈ സാഹചര്യത്തിൽ വന്ദേ ഭാരത് സ്ലീപ്പർ ട്രാക്കിലിറങ്ങുമ്പോൾ കേരളത്തിന് ഒരു ട്രെയിൻ ലഭിക്കുമെന്ന പ്രതീക്ഷയിലാണ് യാത്രക്കാർ. ഈ സാമ്പത്തികവർഷം അവസാനത്തോടെയാകും വന്ദേ ഭാരത് സ്ലീപ്പറുകൾ ഓടിത്തുടങ്ങുക.