ഭോപ്പാല്> കാണാതായ തന്റെ പ്രീയപ്പെട്ട തത്തയെ കണ്ടെത്തുന്നവര്ക്ക് വന്തുക പാരിതോഷികം പ്രഖ്യാപിച്ച് മധ്യപ്രദേശിലെ ദാമോ ജില്ലയിലെ ദീപക് സോണി എന്ന യുവാവ്. തന്റെ തത്തയെ നഷ്ടപ്പെട്ട യുവാവ് വലിയ വിഷമത്തോടെ തെരുവില് അഭ്യര്ഥനയുമായി ഇറങ്ങുകയും ചെയ്തു.ദീപകിന്റെ മിത്തു എന്ന തത്തയെയാണ് കാണാതായത്.
എല്ലാ ദിവസവും വൈകിട്ട് തത്തയെ കൂട്ടില് നിന്നും പുറത്തുവിടാറുണ്ട്.എന്നാല് ബുധനാഴ്ച തത്തയെ തോളിലിരുത്തി ദീപക് പുറത്തേക്ക് പോയപ്പോള് തെരുവ് നായയുടെ കുര കേട്ട് ഭയന്ന തത്ത ദൂരേക്ക് പറന്നുപോവുകയായിരുന്നു.
ഇന്ദിര കോളനിയില് താമസിക്കുന്ന സോണിയുടെ വീട്ടില് കഴിഞ്ഞ രണ്ടു വര്ഷമായി തത്തയുണ്ട്. കുടുംബത്തിലെ എല്ലാവരുടെയും ഓമനയാണ് മിത്തു. പതിനായിരം രൂപ തത്തയെ കണ്ടെത്തി നല്കുന്നവര്ക്ക് പാരിതോഷികം പ്രഖ്യാപിച്ച കുടുംബം തത്തയെ കുറിച്ച് നഗരത്തിലുടനീളം അനൗണ്സുമെന്റുകള് നടത്താന് ഒരു ഓട്ടോറിക്ഷ വാടകക്ക് എടുക്കുകയും ചെയ്തു.
മിത്തുവിനെ കാണാതായതോടെ തകര്ന്ന കുടുംബം അന്ന് രാത്രി മുഴുവന് തത്തയെ തിരഞ്ഞുവെങ്കിലും കണ്ടെത്താനായില്ല. തുടര്ന്നാണ് തത്തയെ കണ്ടെത്തുന്നവര്ക്ക് പാരിതോഷികം പ്രഖ്യാപിച്ചത്.
