ദി ഓവൽ
ആഷസ് അഞ്ചാംടെസ്റ്റ് ക്രിക്കറ്റിൽ ഇംഗ്ലണ്ട് കൂറ്റൻ ലീഡിലേക്ക്. മൂന്നാംദിനം ഏഴിന് 364 റണ്ണെന്ന നിലയിലാണ് ഇംഗ്ലണ്ട്. രണ്ടുദിവസം ശേഷിക്കെ 352 റൺ ലീഡായി. ജോ റൂട്ടും (106 പന്തിൽ 91) ജോണി ബെയർസ്റ്റോയുമാണ് (103 പന്തിൽ 78) തകർത്തടിച്ചത്. സ്കോർ: ഇംഗ്ലണ്ട് 283, 7–-364; ഓസ്ട്രേലിയ 295.
ഒന്നാംഇന്നിങ്സിൽ 12 റൺ ലീഡ് വഴങ്ങിയിരുന്നു ഇംഗ്ലണ്ട്. ഓസ്ട്രേലിയ 295 റണ്ണിന് പുറത്തായി. മൂന്നാംദിനം ബാറ്റിങ് ആരംഭിച്ച ഇംഗ്ലീഷുകാർ ഏകദിന ശൈലിയിൽ ബാറ്റ് വീശി. ഓപ്പണർമാരായ സാക് ക്രോളിയും (76 പന്തിൽ 73) ബെൻ ഡക്കെറ്റും (55 പന്തിൽ 42) മികച്ച തുടക്കമേകി. ഇരുവരും ചേർന്ന് 79 റണ്ണടിച്ചു. മൂന്നാമനായെത്തിയ ക്യാപ്റ്റൻ ബെൻ സ്റ്റോക്സും (42) സ്കോർ ബോർഡ് വേഗത്തിൽ ചലിപ്പിച്ചു. റൂട്ടും ബെയർസ്റ്റോയും ചേർന്നതോടെ ഓസീസിന്റെ നിയന്ത്രണം നഷ്ടമായി.
സെഞ്ചുറിക്ക് ഒമ്പത് റണ്ണകലെവച്ച് റൂട്ടിനെ ടോഡ് മർഫി ബൗൾഡാക്കുകയായിരുന്നു.
