കൊല്ലം > താൻ മരിച്ചെന്ന് പ്രചരിക്കുന്ന വാർത്തകൾ സത്യമല്ലെന്ന് വ്യക്തമാക്കി നടൻ ടി എസ് രാജു രംഗത്ത്. രാവിലെ മുതൽ ടി എസ് രാജു മരിച്ചെന്ന തരത്തിലുള്ള വാർത്തകൾ സോഷ്യൽ മീഡിയയിൽ പ്രചരിച്ചിരുന്നു. നടൻമാരുൾപ്പെടെ പലരും അനുശോചനം അറിയിക്കുകയും ചെയ്തു. എന്നാൽ ഇത് കള്ളമാണെന്നും തനിക്ക് കുഴപ്പമില്ലെന്നും നടൻ തന്നെ വ്യക്തമാക്കി. ടെലിവിഷൻ താരം കിഷോർ സത്യയാണ് ഈ വാർത്ത വ്യാജമാണെന്ന് ആദ്യം വ്യക്തമാക്കിയത്.
തന്റെ പുതിയ സിനിമയുടെ പ്രമോഷന്റെ ഭാഗമായി പുറത്തുവന്ന ചിത്രങ്ങൾ കണ്ട് തെറ്റിദ്ധരിച്ചതാവാം വാർത്തയ്ക്കു പിന്നിലെന്ന് നടൻ പറഞ്ഞു. നിരവധി നാടകങ്ങളിലും സിനിമകളിലും അഭിനയിച്ച ടി എസ് രാജു ടെലിവിഷൻ പരമ്പരകളിലൂടെയാണ് കൂടുതൽ ശ്രദ്ധിക്കപ്പെട്ടത്. ലോഹിതദാസിന്റെ ജോക്കർ എന്ന ചിത്രത്തിലെ വേഷവും ഏറെ ശ്രദ്ധിക്കപ്പെട്ടിരുന്നു.
