തിരുവനന്തപുരം > വ്യാജ ഡിഗ്രി സർട്ടിഫിക്കറ്റ് തയാറാക്കിയെന്ന പരാതിയിൽ കെ.എസ്.യു സംസ്ഥാന കണ്വിനര് അന്സില് ജലീലിനെതിരെ കേസെടുത്തു. വ്യാജരേഖ ചമയ്ക്കൽ, വഞ്ചന എന്നീ കുറ്റങ്ങൾ ചുമത്തി തിരുവനന്തപുരം കന്റോൺമെന്റ് പൊലീസാണ് കേസെടുത്തത്. അന്സില് വ്യാജ ഡിഗ്രി സർട്ടിഫിക്കറ്റ് നിർമിച്ചെന്ന് കേരള സർവകലാശാല രജിസ്ട്രാർ ഡിജിപിക്ക് നൽകിയ പരാതിയിലാണ് തുടർനടപടി.
അന്സില് ജലീലിന് ഇത്തരത്തില് ഒരു ഡിഗ്രി സര്ട്ടിഫിക്കറ്റ് കേരള സര്വകലാശാല നല്കിയിട്ടില്ല. ഇക്കാര്യം വിസി സ്ഥിരീകരിച്ചിരുന്നു. പുറത്തുവന്ന സര്ട്ടിഫിക്കറ്റില് ഉള്ളത് ആ സമയത്തെ വൈസ് ചാന്സലറുടെ ഒപ്പല്ല. അത്തരത്തില് ഒരു സീരിയല് നമ്പറും ആ കാലഘട്ടത്തില് ഉണ്ടായിരുന്നില്ല. ഇതില് സമഗ്ര അന്വേഷണം വേണമെന്നാണ് കേരള സര്വകലാശാലയുടെ ആവശ്യം. ഈ സര്ട്ടിഫിക്കറ്റ് ഉപയോഗിച്ച് അന്സില് സ്വകാര്യ സ്ഥാപനത്തില് ജോലി നേടിയിരുന്നു.
അൻസിൽ ജലീൽ കേരള സർവകലാശാലയിൽ നിന്ന് 2016ൽ ബികോം ബിരുദം നേടിയതായാണ് സർട്ടിഫിക്കറ്റ്. സർവകലാശാലയുടെ ഔദ്യോഗിക എംബ്ലവും ലോഗോയും സീലും വൈസ് ചാൻസിലറുടെ ഒപ്പും സർട്ടിഫിക്കറ്റിലുണ്ട്. വ്യാജ സര്ട്ടിഫിക്കറ്റിലുള്ള വൈസ് ചാന്സിലറുടെ ഒപ്പ് ഡോ. എം കെ രാമചന്ദ്രന് നായരുടേതാണ്. എന്നാല്, സര്ട്ടിഫിക്കറ്റില് കാണിച്ചിരിക്കുന്ന തിയതി പ്രകാരം 2016ല് സര്വകലാശാല വൈസ് ചാന്സിലറായിരുന്നത് പി കെ രാധാകൃഷ്ണനാണ്.
