കൊച്ചി
വാളയാറിൽ കാട്ടാനകൾ ട്രെയിനിടിച്ച് കൊല്ലപ്പെടാതിരിക്കാൻ എന്ത് ചെയ്യാനാകുമെന്ന് പഠിച്ച് റിപ്പോർട്ട് സമർപ്പിക്കാൻ ഹൈക്കോടതിയുടെ നിർദേശം. മനുഷ്യ–-മൃഗ സംഘർഷവുമായി ബന്ധപ്പെട്ട് പഠനം നടത്താൻ നിയോഗിച്ചിട്ടുള്ള വിദഗ്ധസമിതിയോടാണ് ജസ്റ്റിസ് എ കെ ജയശങ്കരൻ നമ്പ്യാർ, ജസ്റ്റിസ് പി ഗോപിനാഥ് എന്നിവരടങ്ങുന്ന ബെഞ്ചിന്റെ നിർദേശം.
മലകൾക്കിടയിലൂടെയാണ് റെയിൽവേ ട്രാക്ക് കടന്നുപോകുന്നത് എന്നതിനാൽ ട്രെയിൻ വരുമ്പോൾ ആനകൾക്ക് മാറിനിൽക്കാൻ മണ്ണ് നീക്കി സൗകര്യം ഒരുക്കുന്നത് പരിശോധിക്കാനും കോടതി നിർദേശിച്ചു. ചിന്നക്കനാലിൽനിന്ന് അരിക്കൊമ്പനെ മാറ്റുന്നതുമായി ബന്ധപ്പെട്ട ഹർജിയാണ് ഡിവിഷൻ ബെഞ്ച് പരിഗണിക്കുന്നത്.
