ഡൽഹി
ഐപിഎൽ ക്രിക്കറ്റിൽ റോയൽ ചലഞ്ചേഴ്സ് ബാംഗ്ലൂരിനെ ഡൽഹി ക്യാപിറ്റൽസ് ഏഴ് വിക്കറ്റിന് തകർത്തു. ബാംഗ്ലൂർ 4–181 റണ്ണെടുത്തു. ഡൽഹി 16.4 ഓവറിൽ ജയം നേടി.
ഫിലിപ് സാൾട്ടിന്റെ (45 പന്തിൽ 87) വെടിക്കെട്ട് ബാറ്റിങ് പ്രകടനമാണ് ഡൽഹിക്ക് ജയമൊരുക്കിയത്. ആറ് സിക്സറും എട്ട് ഫോറുമായിരുന്നു സാൾട്ടിന്റെ ഇന്നിങ്സിൽ.
ബാംഗ്ലൂരിനായി വിരാട് കോഹ്ലിയും മഹിപാൽ ലോംറോറും അർധ സെഞ്ചുറി നേടി. ഓപ്പണറായി ഇറങ്ങിയ ഇന്ത്യൻ ടീം മുൻ ക്യാപ്റ്റൻ 46 പന്തിൽ അഞ്ച് ഫോറിന്റെ പിന്തുണയോടെ 55 റൺ നേടി. ഐപിഎൽ ക്രിക്കറ്റിൽ ഏഴായിരം റൺ നേടുന്ന ആദ്യ കളിക്കാരനുമായി കോഹ്-ലി. ഫാഫ് ഡു പ്ലെസിസ് 32 പന്തിൽ 45 റണ്ണടിച്ചു. ഗ്ലെൻ മാക്സ്വെൽ ആദ്യ പന്തിൽ മടങ്ങി. മഹിപാൽ 29 പന്തിലാണ് പുറത്താകാതെ 54 റൺ സ്വന്തമാക്കിയത്.
