കൊച്ചി > ഒരുമിനിട്ട് വൈകിയെത്തിയതിന് ഹോസ്റ്റലിൽ കയറ്റാതെ പുറത്തുനിർത്തിയ ബിരുദ വിദ്യാർഥിനിയെ തെരുവുനായ ആക്രമിച്ചു. എറണാകുളം തേവര സേക്രഡ് ഹാർട്ട് കോളജിലെ വിദ്യാർഥിനിക്കാണ് പരിക്കേറ്റത്. വ്യാഴാഴ്ച രാത്രി വനിതകളുടെ പ്രതിഭ ഹോസ്റ്റലിന് മുന്നിലാണ് സംഭവം. എസ്എഫ്ഐ പ്രവർത്തകരുടെ പ്രതിഷേധത്തിനൊടുവിൽ ഹോസ്റ്റൽ വാർഡനെ സസ്പെൻഡ് ചെയ്തു.
വൈകീട്ട് 6.30നകം ഹോസ്റ്റലിൽ കയറണമെന്നാണ് നിബന്ധന. എന്നാൽ, കെമിസ്ട്രി ഡിപാർട്മെന്റിലെ ഫെസ്റ്റ് കഴിഞ്ഞ് വരുമ്പോൾ ഒരു മിനിറ്റ് വൈകി 6.31നാണ് തങ്ങൾ ഹോസ്റ്റലിൽ എത്തിയതെന്നും വാർഡൻ പ്രവേശിക്കാൻ സമ്മതിച്ചില്ലെന്നും വിദ്യാർഥിനികൾ പറഞ്ഞു. തുടർന്ന് പുറത്തെ വരാന്തയിൽ ഇരുന്ന വിദ്യാർഥിനികളിൽ ഒരാളെ തെരുവുനായ ആക്രമിക്കുകയായിരുന്നു. പരിക്കേറ്റ വിദ്യാർഥിനിയെ ആശുപത്രിയിലെത്തിക്കാൻ പോലും ഹോസ്റ്റൽ ജീവനക്കാർ തയ്യാറായില്ല. തുടർന്ന് നാട്ടുകാരും സഹപാഠികളും ചേർന്നാണ് ആശുപത്രിയിൽ എത്തിച്ചത്.
