കൊൽക്കത്ത > പശ്ചിമ ബംഗാളിൽ ഉപതെരഞ്ഞെടുപ്പ് നടന്ന സാഗർദിഘി നിയമസഭാ മണ്ഡലത്തിൽ കോൺഗ്രസ് സ്ഥാനാർഥി ജയം ഉറപ്പിച്ചു. ഇടത് പിന്തുണയോടെ മത്സരിച്ച ബയ്റോൺ ബിശ്വാസ് ആണ് മുന്നിലുള്ളത്. 12 റൗണ്ടുകൾ പൂർത്തിയായപ്പോൾ 20000 ത്തിലധികം വോട്ടുകൾക്ക് ബയ്റോൺ ലീഡ് ചെയ്യുകയാണ്. 2021 ലെ തെരഞ്ഞെടുപ്പിൽ തൃണമൂൽ കോൺഗ്രസ് വിജയിച്ച മണ്ഡലമാണിത്. ബിജെപിയായിരുന്നു രണ്ടാംസ്ഥാനത്ത്. ഇത്തവണ തൃണമൂൽ രണ്ടാമതും ബിജെപി മൂന്നാം സ്ഥാനത്തുമാണ്.
മമത സർക്കാരിൽ സഹമന്ത്രിയായിരുന്ന സുബ്രതാ സാഹയായിരുന്നു സാഗർദിഘിയിൽനിന്ന് വിജയിച്ചത്. കഴിഞ്ഞ ഡിസംബറിൽ ആണ് സാഹ ഹൃദയാഘാതത്തെ തുടർന്ന് മരിച്ചത്. ഇതേത്തുടർന്നാണ് ഉപതെരഞ്ഞെടുപ്പ്. 1977 മുതൽ 2006 വരെ തുടർച്ചയായി ഏഴ് തവണ സിപിഐ എം വിജയിച്ച മണ്ഡലമാണ് സാഗർദിഘി.
