കൊച്ചി
പ്രൈം വോളിബോൾ ലീഗിൽ കൊച്ചി ബ്ലൂ സ്പൈക്കേഴ്സിന് തോൽവി. അഹമ്മദാബാദ് ഡിഫൻഡേഴ്സാണ് കൊച്ചിയെ തകർത്തത്. എറണാകുളം രാജീവ് ഗാന്ധി ഇൻഡോർ സ്റ്റേഡിയത്തിൽ നടന്ന മത്സരത്തിൽ അഞ്ച് സെറ്റ് ത്രില്ലറിനൊടുവിലാണ് അഹമ്മദാബാദിന്റെ ജയം.
സ്കോർ: 15-–-5, 11-–-15, 9-–-15, 15-–-12, 15-–-14.
ജയത്തോടെ അഹമ്മദാബാദ് സെമി ഉറപ്പാക്കി. ആറ് മത്സരങ്ങളിൽ അഞ്ചും ജയിച്ച് 11 പോയിന്റുമായി ഒന്നാമത് തുടർന്നു. ആറ് കളിയിൽ കൊച്ചിയുടെ അഞ്ചാംതോൽവിയാണിത്.
ആദ്യ സെറ്റ് നഷ്ടമായശേഷം രണ്ടും മൂന്നും നേടി കൊച്ചി തിരിച്ചുവന്നിരുന്നു. എന്നാൽ അവസാന രണ്ട് സെറ്റിലും അഹമ്മദാബാദിന്റെ കുതിപ്പിൽ നിഷ്പ്രഭരായി. അംഗമുത്തുവിന്റെയും മനോജിന്റെയും തകർപ്പൻ പ്രകടനമാണ് നാലാം സെറ്റിൽ അഹമ്മദാബാദിനെ ജയത്തിലേക്ക് നയിച്ചത്. അവസാന സെറ്റിൽ അംഗമുത്തുവിന്റെ തകർപ്പൻ സ്മാഷുകൾ കൊച്ചിയുടെ മോഹം തകർത്തു.
ഇന്ന് നിലവിലെ ചാമ്പ്യൻമാരായ കൊൽക്കത്ത തണ്ടർബോൾട്സ് ചെന്നൈ ബ്ലിറ്റ്സിനെ നേരിടും. ആറ് മത്സരങ്ങളിൽനിന്ന് ഒരുജയംമാത്രമുള്ള ചെന്നൈ സെമി കാണാതെ പുറത്തായിരുന്നു.
