മുംബൈ
ഇന്ത്യൻ ഫുട്ബോളിൽ വലിയ മാറ്റങ്ങളൊന്നും സംഭവിക്കുന്നില്ലെന്ന് ഈസ്റ്റ് ബംഗാൾ പരിശീലകൻ സ്റ്റീഫൻ കോൺസ്റ്റന്റൈൻ.
ഇന്ത്യൻ ഫുട്ബോൾ മറ്റ് ഏഷ്യൻ രാജ്യങ്ങളേക്കാൾ അഞ്ചുവർഷം പിന്നിലാണ്. യൂറോപ്യൻ ടീമുകളുമായി താരതമ്യപ്പെടുത്താനേ കഴിയില്ല–- മുൻ ഇന്ത്യൻ പരിശീലകൻകൂടിയായ ഇംഗ്ലീഷുകാരൻ പറഞ്ഞു.
‘ഇന്ത്യൻ ഫുട്ബോൾ ഒന്നും ചെയ്യുന്നില്ല എന്നതാണ് യാഥാർഥ്യം. ഐഎസ്എല്ലിൽ ഒരു ഇന്ത്യൻ പരിശീലകൻ പോലുമില്ല. ഐ ലീഗിലെ പകുതി ടീമുകൾക്കും വിദേശികളാണ് പരിശീലകർ. വിദേശത്ത് കളിക്കുന്ന ഒരു ഇന്ത്യൻ താരംപോലും ഇപ്പോഴില്ല. ജില്ലാ ലീഗുകളാണ് ആവശ്യം.
അഞ്ചുമുതൽ ഏഴുവരെയുള്ള കുട്ടികളെ പരിശീലിപ്പിക്കാനുള്ള പരിശീലകർ വേണം. 16–-ാം വയസ്സിലല്ല ഫുട്ബോൾ തുടങ്ങേണ്ടത്. സാഫ് കപ്പിൽപ്പോലും തുടർച്ചയായി ജയിക്കാനാകുന്നില്ല. ഏഷ്യൻ കപ്പിൽ സ്ഥിരമായി കളിക്കാനാകുന്നില്ല. കഴിവുള്ള കളിക്കാരുടെ എണ്ണം കുറയുന്നു–- കോൺസ്റ്റന്റൈൻ പറഞ്ഞു.
