തിരുവനന്തപുരം
കേരള സംസ്ഥാന യുവജനക്ഷേമ ബോർഡ് അവളിടം ക്ലബിന്റെ നേതൃത്വത്തിൽ ഹൈസ്കൂളിൽ സംഘടിപ്പിക്കുന്ന ശാസ്ത്ര ക്വിസിന്റെ പ്രാഥമിക മത്സരങ്ങൾക്ക് തുടക്കമായി. യുവജനങ്ങളിൽ ശാസ്ത്ര–-ചരിത്രബോധവും യുക്തിചിന്തയും വളർത്തുകയെന്ന ലക്ഷ്യവുമായി സംസ്ഥാനമാകെ വിവിധതലങ്ങളിലായാണ് ക്വിസ് സംഘടിപ്പിക്കുന്നത്. രണ്ടുപേരുള്ള ടീമിന് പങ്കെടുക്കാം. ഹൈസ്കൂൾതലം, നിയമസഭാ മണ്ഡലതലം, ജില്ലാതലം, സംസ്ഥാന തലം എന്നിങ്ങനെയാണ് മത്സരങ്ങൾ. സംസ്ഥാനതലത്തിൽ ഒന്നാമതെത്തുന്നയാൾക്ക് ഒരു ലക്ഷം രൂപയാണ് സമ്മാനം. രണ്ടാംസ്ഥാനത്തിന് 50,000 രൂപയും ലഭിക്കും.
ഹൈസ്കൂൾ മത്സരത്തിൽ പങ്കെടുക്കുന്നവർക്ക് സർട്ടിഫിക്കറ്റ് ലഭിക്കും. നിയമസഭാമണ്ഡലത്തിൽ ഒന്നും രണ്ടും സ്ഥാനം നേടുന്നവർക്ക് 2,000, 1000 രൂപവീതവും ജില്ലാതല ജേതാക്കൾക്ക് 10,000, 5000 രൂപ വീതവും ലഭിക്കും. സംസ്ഥാനതലത്തിൽ ഓരോജില്ലയെയും പ്രതിനിധീകരിക്കുന്നവർക്ക് പ്രോത്സാഹന സമ്മാനമായി 5,000 രൂപവീതം നൽകും.
