തിരുവനന്തപുരം
സംസ്ഥാനത്തെ 28 തദ്ദേശസ്ഥാപന വാർഡിൽ ഉപതെരഞ്ഞെടുപ്പിനുള്ള വോട്ടർപട്ടിക പുതുക്കുന്നു. കരടു പട്ടിക വെള്ളിയാഴ്ച പ്രസിദ്ധീകരിക്കും. 21 വരെ പേരു ചേർക്കാൻ അപേക്ഷിക്കാം. ജനുവരി ഒന്നിനോ മുമ്പോ 18 വയസ്സ് പൂർത്തിയായ അർഹതപ്പെട്ടവർക്ക് പേര് ചേർക്കാം. ഇതിനായി http://www.lsgelection. kerala.gov.in ൽ ഓൺലൈൻ അപേക്ഷ നൽകണം.
കരട് പട്ടികയിലെ ഉൾക്കുറിപ്പുകളിൽ ഭേദഗതി വരുത്താനും സ്ഥാനമാറ്റം വരുത്താനുമുള്ള അപേക്ഷകളും ഓൺലൈനായി നൽകാം. പേര് ഒഴിവാക്കാനുള്ള ആക്ഷേപങ്ങൾ ഫോറം അഞ്ചിൽ നേരിട്ടോ തപാലിലൂടെയോ ഇലക്ടറൽ രജിസ്ട്രേഷൻ ഓഫീസർക്ക് സമർപ്പിക്കണം. അന്തിമപട്ടിക 30ന് പ്രസിദ്ധീകരിക്കും.
കരട് പട്ടിക അതത് തദ്ദേശസ്ഥാപനത്തിലും താലൂക്ക് ഓഫീസുകളിലും വില്ലേജ് ഓഫീസുകളിലും പ്രസിദ്ധീകരിക്കുമെന്ന് സംസ്ഥാന തെരഞ്ഞെടുപ്പ് കമീഷണർ എ ഷാജഹാൻ അറിയിച്ചു. കമീഷന്റെ വെബ്സൈറ്റിലും ലഭിക്കും.
ഉപതെരഞ്ഞെടുപ്പ് നടത്തുന്ന സ്ഥലങ്ങൾ
തിരുവനന്തപുരം: കടയ്ക്കാവൂർ പഞ്ചായത്തിലെ നിലയ്ക്കാമുക്ക്.
കൊല്ലം: കൊല്ലം കോർപറേഷനിലെ മീനത്തുചേരി, വിളക്കുടി പഞ്ചായത്തിലെ കുന്നിക്കോട് വടക്ക്, ഇടമുളക്കൽ പഞ്ചായത്തിലെ തേവർതോട്ടം.
പത്തനംതിട്ട: കല്ലൂപ്പാറ പഞ്ചായത്തിലെ അമ്പാട്ടുഭാഗം.
ആലപ്പുഴ: തണ്ണീർമുക്കം പഞ്ചായത്തിലെ തണ്ണീർമുക്കം, എടത്വാ പഞ്ചായത്തിലെ തായങ്കരി വെസ്റ്റ്.
കോട്ടയം: എരുമേലി പഞ്ചായത്തിലെ ഒഴക്കനാട്, പാറത്തോട് പഞ്ചായത്തിലെ ഇടക്കുന്നം, കടപ്ലാമറ്റം പഞ്ചായത്തിലെ വയലാ ടൗൺ, വെളിയന്നൂർ പഞ്ചായത്തിലെ പൂവക്കുളം.
എറണാകുളം: പോത്താനിക്കാട് പഞ്ചായത്തിലെ തായ്മറ്റം.
തൃശൂർ: തളിക്കുളം ബ്ലോക്ക് പഞ്ചായത്തിലെ തളിക്കുളം ഡിവിഷൻ, കടങ്ങോട് പഞ്ചായത്തിലെ ചിറ്റിലങ്ങാട്.
പാലക്കാട്: പാലക്കാട് ജില്ലാ പഞ്ചായത്തിലെ ആലത്തൂർ, ആനക്കര പഞ്ചായത്തിലെ മലമക്കാവ്, കടമ്പഴിപ്പുറം പഞ്ചായത്തിലെ പാട്ടിമല, തൃത്താല പഞ്ചായത്തിലെ വരണ്ടു കുറ്റികടവ്, വെള്ളിനേഴി പഞ്ചായത്തിലെ കാന്തള്ളൂർ.
മലപ്പുറം: അബ്ദുറഹിമാൻ നഗർ പഞ്ചായത്തിലെ കുന്നുംപുറം, കരുളായി പഞ്ചായത്തിലെ ചക്കിട്ടാമല, തിരുനാവായ പഞ്ചായത്തിലെ അഴകത്തുകളം, ഊരകം പഞ്ചായത്തിലെ കൊടലിക്കുണ്ട്.
കോഴിക്കോട്: ചെറുവണ്ണൂർ പഞ്ചായത്തിലെ കക്കറമുക്ക്.
വയനാട്:സുൽത്താൻ ബത്തേരി നഗരസഭയിലെ പാളാക്കര.
കണ്ണൂർ: ശ്രീകണ്ഠപുരം നഗരസഭയിലെ കോട്ടൂർ, പേരാവൂർ പഞ്ചായത്തിലെ മേൽമുരിങ്ങോടി, മയ്യിൽ പഞ്ചായത്തിലെ വള്ളിയോട്ട്.
