ന്യൂഡൽഹി > കേരളത്തിൽ ഏതെങ്കിലും സിപിഐ എം നേതാക്കൾക്കെതിരെ ആരോപണമോ ആക്ഷേപമോ ഉയർന്നതായി തന്റെ ശ്രദ്ധയിൽപെട്ടിട്ടില്ലെന്ന് പാർടി ജനറൽ സെക്രട്ടറി സീതാറാം യെച്ചൂരി പറഞ്ഞു. കേരളത്തിലെ മാധ്യമങ്ങൾക്ക് വിവാദങ്ങളാണ് വേണ്ടത്. അതൊന്നും പൊളിറ്റ് ബ്യൂറോയിൽ ചർച്ചചെയ്തിട്ടില്ല. പൊളിറ്റ്ബ്യൂറോയ്ക്ക് മുന്നിൽ ഒന്നും വന്നിട്ടില്ല. ആർക്കെതിരെയും പരാതി ലഭിച്ചിട്ടില്ല. കേരളവുമായി ബന്ധപ്പെട്ട് ചർച്ച ചെയ്തത് ഗവർണറുടെ നിയമവിരുദ്ധ ഇടപെടലുകളാണ് – മാധ്യമപ്രവർത്തകരുടെ ചോദ്യങ്ങളോട് സീതാറാം യെച്ചൂരി പ്രതികരിച്ചു.
ഭാരത് ജോഡോ യാത്രയിൽസിപിഐ എം നേതാക്കളാരും പങ്കെടുക്കില്ലെന്ന് അദ്ദേഹം വ്യക്തമാക്കി. ജോഡോ യാത്ര കോൺഗ്രസിന്റെ പരിപാടിയാണ്. അതിൽസിപിഐ എം നേതാക്കൾപങ്കെടുക്കേണ്ട കാര്യമെന്താണ്? സിപിഐ എം സ്വന്തമായ പരിപാടികൾനടത്തുന്നുണ്ടെന്നും അദ്ദേഹം ചൂണ്ടിക്കാട്ടി. പാർടി കേന്ദ്രകമ്മിറ്റിയംഗം മുഹമ്മദ് യൂസഫ് തരിഗാമി ജോഡോ യാത്രയിൽ പങ്കെടുക്കുമെന്ന കോൺഗ്രസ് അവകാശവാദത്തോട് പ്രതികരിക്കുകയായിരുന്നു സീതാറാം യെച്ചൂരി. മാധ്യമങ്ങൾക്ക് മുമ്പാകെ എന്തെങ്കിലും പറയാനുണ്ടെങ്കിൽ അങ്ങോട്ട് വന്ന് പറയാമെന്ന് മുഖ്യമന്ത്രി പിണറായി വിജയൻ ചാനലുകളോട് പ്രതികരിച്ചു.
