തലശേരി> കുട്ടികളുടെ ക്രിസ്മസ് കരോൾ സംഘത്തിന് നേരെ ആർഎസ്എസ് അക്രമം. കോടിയേരി മാടപ്പീടിക കുറ്റിവയലിൽ വെള്ളിയാഴ്ച രാത്രി 9മണിയോടെയാണ് സംഭവം. ആർഎസ്എസ് സംഘം കരോൾസംഘത്തെ തടയുകയും കുട്ടികളെ മർദിക്കുകയുമായിരുന്നു. ഒരു കുട്ടിയുടെ കൈ ബലമായി പിന്നിലേക്ക് പിടിച്ച് മുഖത്തടിച്ചു. കുറ്റിവയൽ പ്രദേശത്ത് ക്രിസ്മസ് കരോൾ അനുവദിക്കില്ലെന്ന് പറഞ്ഞായിരുന്നു മർദനം.
കഴിഞ്ഞദിവസം ഇതേ പ്രദേശത്ത് എത്തിയ മറ്റൊരു സംഘത്തെയും തടഞ്ഞിരുന്നു. ഇക്കാര്യം അറിയാതെ വയലളം ഭാഗത്തുനിന്നെത്തിയ കുട്ടികളാണ് ആക്രമിക്കപ്പെട്ടത്. എസ്എസ്എൽസി, പ്ലസ് വൺ വിദ്യാർഥികളാണ് സംഘത്തിലുണ്ടായിരുന്നതിലേറെയും. ഉണ്ണിയേശുവിന്റെ തിരുപ്പിറവിയുടെ ആഹ്ലാദസൂചകമായി ജിംഗിൾബെൽസ് പാടി വീടുകളിലെത്തുന്ന കരോൾ സംഘങ്ങൾ മധുരം നൽകാറുണ്ട്. ജാതിമതഭേദമില്ലാതെ ജനങ്ങൾ ക്രിസ്മസിനെ വരവേൽകാൻ ഒരുങ്ങുമ്പോഴാണ് കരോൾസംഘത്തിനെതിരായ മർദനം.
അക്രമിസംഘത്തിലെ മൂന്ന് പേരെ ന്യൂമാഹി പൊലീസ് അറസ്റ്റ് ചെയ്തു. മാടപ്പീടിക കുറ്റിവയലിലെ ചീക്കോളി സനീഷ്, ഷിജിത്ത് രാമദാസ്, ഒ സി രതീഷ് എന്നിവരെയാണ് അറസ്റ്റ് ചെയ്തത്. കുട്ടികളെ മർദിച്ച സംഭവത്തിൽ ബാലവകാശ കമ്മീഷൻ ചെയർമാൻ അഡ്വ കെ വി മനോജ്കുമർ ന്യൂമാഹി പൊലീസിനോട് റിപ്പോർട്ട് തേടി. കുട്ടികളുടെ ക്രിസ്മസ് കരോൾ സംഘത്തെ ആക്രമിച്ചതിൽ ബാലസംഘം തലശേരി ഏരിയകമ്മിറ്റി പ്രതിഷേധിച്ചു.
