കൊച്ചി
വൻ വിജയമായ ബജറ്റ് ടൂറിസം പദ്ധതിക്കുകീഴിൽ പുതുവത്സരാഘോഷത്തിനായി പ്രത്യേക പാക്കേജ് പ്രഖ്യാപിച്ച് കെഎസ്ആർടിസി. ‘മിസ്റ്റി നൈറ്റ് 2023’ എന്ന പേരിൽ വാഗമണിൽ 31ന് രാത്രി ഒമ്പതുമുതൽ 2023 ജനുവരി ഒന്നിന് പുലർച്ചെ 12.30 വരെ നീളുന്ന ആഘോഷരാവാണ് ഒരുക്കുന്നത്. യാത്രയ്ക്കൊപ്പം ഭക്ഷണവും ഗാനമേളയും ഡിജെ പാർടിയും ക്യാമ്പ് ഫയറും ഉൾപ്പെടുന്നതാണ് പരിപാടി.
ആഡംബരക്കപ്പലായ നെഫർറ്റിറ്റിയിൽ കൊച്ചിയിൽ പുതുവത്സരാഘോഷത്തിൽ പങ്കെടുക്കുന്നതിനും അവസരമുണ്ട്. 31ന് രാത്രി എട്ടുമുതൽ 2023 ജനുവരി ഒന്നിന് പുലർച്ചെ ഒന്നുവരെയാണ് പരിപാടി. ഭക്ഷണം, ഡിജെ പാർടി, ഓപ്പൺ ഡക് ഡിജെ എന്നിവ ഉൾപ്പെടുന്നതാണ് പരിപാടി. ഇതുകൂടാതെ തിരുവനന്തപുരത്തുനിന്ന് മൂന്നുദിവസം നീളുന്ന വയനാട് യാത്ര, രണ്ടുദിവസത്തെ മൂന്നാർ, ഗവി, വണ്ടർലാ, കുമരകം, തിരുവൈരാണിക്കുളം, നാലമ്പലദർശനം, പഞ്ചപാണ്ഡവദർശനം ഏകദിനയാത്രാ പാക്കേജുകളും ലഭ്യമാണ്. കെഎസ്ആർടിസിയുടെ ഡിപ്പോകളിൽ യാത്രകൾ ബുക്ക് ചെയ്യാം.
