കണ്ണൂർ> സമകാലിക ജീവിതവൈവിധ്യങ്ങളുടെ നേർക്കാഴ്ച്ചയൊരുക്കി തളിപ്പറമ്പിൽ ഹാപ്പിനസ് ഇന്റർനാഷണൽ ഫിലിം ഫെസ്റ്റിവലിന് തുടക്കമാകുന്നു. ഡിസംബർ 19ന് സംവിധായകൻ അടൂർ ഗോപാലകൃഷ്ണൻ മേള ഉദ്ഘാടനം ചെയ്യും. ലോകസിനിമ, ഇന്ത്യൻ, മലയാള സിനിമ എന്നീ വിഭാഗങ്ങളിൽ മൂന്ന് ദിവസങ്ങളിലായി 31 ചലച്ചിത്രങ്ങളാണ് മേളയിൽ പ്രദർശിപ്പിക്കുന്നത്. ക്ലാസ്സിക്, ആലിങ്കീൽ, മൊട്ടമ്മൽ മാൾ എന്നിവിടങ്ങളിലായാണ് ചലച്ചിത്രോത്സവം സംഘടിപ്പിക്കുന്നത്.
മേളയുടെ ഓൺലൈൻ രജിസ്ട്രേഷൻ ആരംഭിച്ചു. പൊതുവിഭാഗത്തിന് 300 രൂപയും വിദ്യാർത്ഥികൾക്ക് 150 രൂപയുമാണ് രജിസ്ട്രേഷൻ ഫീസ്. ഹാപ്പിനെസ്സ് ഫെസ്റ്റിവലിന്റെ ഭാഗമായി കേരള ചലച്ചിത്ര അക്കാദമിയുടെ ആഭിമുഖ്യത്തിലാണ് അന്താരാഷ്ട്ര ചലച്ചിത്ര മേള സംഘടിപ്പിക്കുന്നത്. ഐഎഫ്എഫ്കെയുടെ റീജിയണൽ ഫെസ്റ്റ് എന്ന നിലയിലാണ് ചലച്ചിത്രമേള സംഘടിപ്പിക്കുന്നത്. ഐഎഫ്എഫ്കെയുടെ മത്സര വിഭാഗത്തിലെയും മലയാള ചലച്ചിത്ര വിഭാഗത്തിലെയും മുഴുവൻ സിനിമകളും ചലച്ചിത്ര മേളയുടെ ഭാഗമായി പ്രദർശിപ്പിക്കും. ചലച്ചിത്ര മേളയുടെ ഭാഗമായി എല്ലാ ദിവസവും ഓപ്പൺ ഫോറവും ഉണ്ടാവും.
ഫിലിം ഫെസ്റ്റിവലിന്റെ ഭാഗമായി ടൂർ ഇൻ ടാക്കീസ്, ഫിലിം എക്സിബിഷൻ, വിദ്യാർത്ഥികൾക്കായി ചലച്ചിത്ര വർക്ക് ഷോപ്പ് എന്നിവയും ഉണ്ടാകും. https://registration.iffk.in/index.php/Accountrecovery/registration എന്ന ലിങ്ക് ഉപയോഗിച്ച് ഓൺലെെനായി രജിസ്റ്റർ ചെയ്യാം.
