തൃശൂർ> ഡൽഹി കേന്ദ്രീകരിച്ച് കേരളത്തിലേക്ക് സിന്തറ്റിക് മയക്കുമരുന്ന് കടത്തുന്ന നൈജീരിയൻ യുവാവിനെ സിറ്റി പൊലീസ് ഡൽഹിയിൽ നിന്ന് അറസ്റ്റ് ചെയ്തു. മയക്കുമരുന്ന് ചില്ലറവിൽപ്പനക്കാർക്കിടയിൽ കെൻ എന്ന് വിളിപ്പേരുള്ള നൈജീരിയൻ പൗരൻ എബൂക്ക വിക്ടർ അനയോ (27) എന്നയാളെയാണ് ന്യൂഡൽഹിയിലെ നൈജീരിയൻ കോളനിയിൽ നിന്നും തൃശൂർ സിറ്റി പൊലീസ് അറസ്റ്റ് ചെയ്തത്. ഇയാൾ എംഡിഎംഎ ഉൾപ്പെടെയുള്ള അതിമാരക സിന്തറ്റിക് മയക്കുമരുന്നുകൾ വിതരണം ചെയ്യുന്നയാളാണ്.
കേരളമുൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിലേക്ക് വ്യാപകമായി മയക്കുമരുന്ന് കടത്തുന്ന സംഘത്തിലെ പ്രധാനിയാണ്. കർണ്ണാടക, തമിഴ്നാട്, കേരളം എന്നീ സംസ്ഥാനങ്ങളിലെ യുവാക്കൾക്കിടയിലാണ് ഇയാളുടെ ശൃംഖല പ്രവർത്തിച്ചിരുന്നത്. മെയ് മാസത്തിൽ മണ്ണുത്തിയിൽ നടത്തിയ വാഹന പരിശോധനക്കിടെ ചാവക്കാട് സ്വദേശി ബുർഹാനുദ്ദീൻ എന്നയാളിൽ നിന്നും 196 ഗ്രാം എംഡിഎംഎ പിടികൂടിയിരുന്നു. ഇയാളെ വിശദമായി ചോദ്യം ചെയ്തതിൽ ഇവർക്ക് മയക്കുമരുന്ന് വിതരണം ചെയ്യുന്ന സുഡാൻ സ്വദേശി മുഹമ്മദ് ബാബിക്കർ അലി, പാലസ്തീൻ സ്വദേശി ഹസൻ എന്നിവരെക്കുറിച്ചുള്ള വിവരം ലഭിച്ചു. തുടർന്ന് നടത്തിയ അന്വേഷണത്തിൽ ഇരുവരേയും ബംഗളൂരുവിൽ നിന്നും 300 ഗ്രാം എംഡിഎംഎ സഹിതം പിടികൂടിയിരുന്നു. അന്ന് അറസ്റ്റിലായ സുഡാൻ സ്വദേശി മുഹമ്മദ് ബാബിക്കർ അലിയെ ചോദ്യം ചെയ്തതിൽ നിന്നാണ് മയക്കുമരുന്ന് കടത്തുന്ന നൈജീരിയൻ പൗരനെക്കുറിച്ചുള്ള വിവരം ലഭിച്ചത്.
കർണ്ണാടക, തമിഴ്നാട്, കേരളം എന്നീ സംസ്ഥാനങ്ങളിലേക്ക് വ്യാപകമായി എംഡിഎംഎ കടത്തുന്നതിനുപിന്നിൽ ഇയാളാണെന്നും അറിയാൻ കഴിഞ്ഞിരുന്നു. ഏറെനാളത്തെ നിരന്തര നിരീക്ഷണത്തിനും രഹസ്യാന്വേഷണത്തിനും ശേഷമാണ് ഇയാളെ തൃശൂർ സിറ്റി പൊലീസ് അറസ്റ്റ് ചെയ്തത്. അറസ്റ്റിലായ പ്രതിയെ ന്യൂഡൽഹി സാകേത് കോടതിയിൽ ഹാജരാക്കി. തുടർന്ന് രണ്ടു ദിവസം തിഹാർ ജയിലിൽ അടച്ചു. ഇതിനുശേഷമാണ് കേരളത്തിലേക്ക് കൊണ്ടുവരുന്നതിന് അനുമതി ലഭിച്ചത്. മണ്ണുത്തി പൊലീസ് സ്റ്റേഷൻ സബ് ഇൻസ്പെക്ടർ എൻ പ്രദീപ്, ജില്ലാ പൊലീസ് ലഹരിവിരുദ്ധ വിഭാഗം സബ് ഇൻസ്പെക്ടർമാരായ എൻ ജി സുവ്രതകുമാർ, പി രാഗേഷ്, സീനിയർ സിവിൽ പൊലീസ് ഓഫീസർ ടി വി ജീവൻ, സിവിൽ പൊലീസ് ഓഫീസർ കെ വി വിപിൻദാസ് എന്നിവരുടെ നേതൃത്വത്തിലുള്ള പൊലീസ് സംഘമാണ് ഡൽഹിയിൽ നിന്നും പ്രതിയെ പിടികൂടിയത്.
