വിജയ്‌ ഹസാരെ ട്രോഫി : രോഹന്‌ സെഞ്ചുറി, കേരളത്തിന്‌ ജയം

ബംഗളൂരു
രോഹൻ എസ് കുന്നുമ്മല്ലിന്റെ മിന്നും സെഞ്ചുറിയിൽ കേരളത്തിന് തുടർച്ചയായ രണ്ടാംജയം. വിജയ് ഹസാരെ ട്രോഫി ഏകദിന ക്രിക്കറ്റിൽ ഗോവയെ അഞ്ച് വിക്കറ്റിന് തകർത്തു. 242 റൺ വിജയലക്ഷ്യം 71 പന്ത് ബാക്കിനിൽക്കേ കേരളം മറികടന്നു. ഓപ്പണർ രോഹൻ 101 പന്തിൽ 134 റണ്ണിടച്ചു. നാല് സിക്സറും 17 ഫോറും ഇരുപത്തിനാലുകാരൻ പായിച്ചു. ആദ്യകളിയിൽ അരുണാചൽ പ്രദേശിനെതിരെ 28 പന്തിൽ പുറത്താകാതെ 77 റൺ നേടിയിരുന്നു രോഹൻ. ഗോവയ്ക്കെതിരെ ക്യാപ്റ്റൻ സച്ചിൻ ബേബിയും (51*) മിന്നി. സ്കോർ: ഗോവ 8–-241 കേരളം 5–-242 (38.1). നാളെ ചത്തീസ്ഗഢുമായാണ് അടുത്തമത്സരം.