മലപ്പുറം
ലോകംമുഴുവൻ ഒരു പന്തിനു പിറകെ പായുന്ന ആവേശപ്പൂരത്തെ വരവേൽക്കാൻ ദേശാഭിമാനിയും. ലോകകപ്പ് വിശേഷങ്ങളുമായി ദേശാഭിമാനിയുടെ പ്രത്യേക പതിപ്പ് ‘കളിക്കളം’ പുറത്തിറങ്ങി. മുൻ ലോകകപ്പ് മത്സരങ്ങൾ, പ്രശസ്ത താരങ്ങളെക്കുറിച്ചുള്ള കുറിപ്പുകൾ, കളിക്കളത്തിലെ അപൂർവ നിമിഷങ്ങൾ, പ്രശസ്തരുടെ അനുഭവങ്ങൾ തുടങ്ങി പുൽമൈതാനത്തെ സമഗ്രമായി അവതരിപ്പിക്കുന്നതാണ് ‘കളിക്കളം’.
ഫുട്ബോൾ ആരാധകരുടെ മണ്ണായ മലപ്പുറത്തെ കോട്ടപ്പടി മൈതാനത്ത് മുൻ ദേശീയ–- സംസ്ഥാന താരങ്ങളുടെയും ഫുട്ബോൾ ആരാധകരുടെയും കാണികളുടെയും സാന്നിധ്യത്തിൽ മന്ത്രി വി അബ്ദുറഹിമാൻ ‘കളിക്കളം’ പ്രകാശിപ്പിച്ചു. മുൻ ഇന്ത്യൻ ക്യാപ്റ്റൻ യു ഷറഫലി ഏറ്റുവാങ്ങി.
പി ഉബൈദുള്ള എംഎൽഎ, സിപിഐ എം ജില്ലാ സെക്രട്ടറി ഇ എൻ മോഹൻദാസ്, ജില്ലാ സ്പോർട്സ് കൗൺസിൽ പ്രസിഡന്റ് വി പി അനിൽ, മുൻ ദേശീയതാരം പി ഹബീബ് റഹ്മാൻ, ജില്ലാ ഫുട്ബോൾ അസോസിയേഷൻ വൈസ് പ്രസിഡന്റ് സുരേന്ദ്രൻ മങ്കട, മലപ്പുറം ഫുട്ബോൾ ലവേഴ്സ് ഭാരവാഹികളായ ഉപ്പൂടൻ ഷൗക്കത്ത്, പി കെ അസ്ലു, മുൻ താരങ്ങളായ ടൈറ്റാനിയം അൻവർ, എ ശശി, കൗൺസിലർ സി സുരേഷ്, ദേശാഭിമാനി യൂണിറ്റ് മാനേജർ ആർ പ്രസാദ്, ന്യൂസ് എഡിറ്റർ ഇ എസ് സുഭാഷ് എന്നിവർ പങ്കെടുത്തു.
