കോട്ടയം
കേരള കർഷകസംഘം 27–-ാം സംസ്ഥാന സമ്മേളനം 18 മുതൽ 21വരെ കോട്ടയത്ത് ചേരും. 17ന് ഉൽപ്പന്ന ജാഥകളും 18ന് പതാക–- കൊടിമര ജാഥകളും പര്യടനം നടത്തും. 18ന് വൈകിട്ട് അഞ്ചിന് ജാഥകൾ സംഗമിച്ച് പൊതുസമ്മേളന വേദിയായ തിരുനക്കര മൈതാനത്ത് (സ. അയ്മനംബാബു നഗർ) എത്തും. സ്വാഗതസംഘം ചെയർമാൻ എ വി റസൽ പതാക ഉയർത്തും. പ്രതിനിധി സമ്മേളനത്തിന് തുടക്കംകുറിച്ച് 19ന് രാവിലെ ഒമ്പതിന് മാമൻമാപ്പിള ഹാളിൽ (സ.കെ വി വിജയദാസ് നഗർ) പ്രസിഡന്റ് എം വിജയകുമാർ പതാക ഉയർത്തും. സമ്മേളനം കിസാൻസഭ ജനറൽ സെക്രട്ടറി -ഹന്നൻമൊള്ള ഉദ്ഘാടനം ചെയ്യും. 620 പ്രതിനിധികൾ പങ്കെടുക്കും. പകൽ 11ന് ‘കേരളത്തിന്റെ കാർഷിക മേഖലയിലെ കടമകൾ’ വിഷയം -എസ് രാമചന്ദ്രൻപിള്ള അവതരിപ്പിക്കും. സംസ്ഥാന സെക്രട്ടറി -വത്സൻ പനോളി പ്രവർത്തന റിപ്പോർട്ട് അവതരിപ്പിക്കും. വൈകിട്ട് അഞ്ചിന് തിരുനക്കര മൈതാനത്ത് സെമിനാർ അഖിലേന്ത്യാ കിസാൻസഭ പ്രസിഡന്റ് ഡോ.അശോക് ധാവ്ളെ ഉദ്ഘാടനം ചെയ്യും. മന്ത്രി കെ എൻ ബാലഗോപാൽ അധ്യക്ഷനാകും. 20ന്റെ സെമിനാർ മന്ത്രി -വി എൻ വാസവൻ ഉദ്ഘാടനം ചെയ്യും. 21വരെ പ്രതിനിധി സമ്മേളനം തുടരും. വൈകിട്ട് നാലിന് തിരുനക്കര മൈതാനത്ത് പൊതുസമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.
സമ്മേളനത്തോടനുബന്ധിച്ചുള്ള പുസ്തകമേള പഴയ പൊലീസ് സ്റ്റേഷൻ മൈതാനത്ത് ഞായർ രാവിലെ 9.30ന് സിപിഐ എം സംസ്ഥാന സെക്രട്ടറി എം വി ഗോവിന്ദൻ ഉദ്ഘാടനംചെയ്യും. കാർഷിക പ്രദർശനം നാഗമ്പടത്ത് തുടരുന്നു. വാർത്താസമ്മേളനത്തിൽ സംസ്ഥാന സെക്രട്ടറി വത്സൻ പനോളി, സ്വാഗതസംഘം ചെയർമാൻ എ വി റസൽ, സെക്രട്ടറി കെ എം രാധാകൃഷ്ണൻ, പ്രൊഫ. എം ടി ജോസഫ്, പ്രൊഫ. ആർ നരേന്ദ്രനാഥ്, അഡ്വ. ജോസഫ് ഫിലിപ്പ് തുടങ്ങിയവർ പങ്കെടുത്തു.
