ശാസ്താംകോട്ട
രാവിലെ എത്തിയ ജപ്തി നോട്ടീസ് കണ്ട് പൂക്കുഞ്ഞിന്റ മനസ്സ് പിടഞ്ഞു. തൊട്ടുപിന്നാലെ പ്ലാമൂട്ടിൽ ചന്തയിലെ ലോട്ടറിക്കടയിൽനിന്ന് പൂക്കുഞ്ഞ് ഒരു ടിക്കറ്റെടുത്തു. വൈകിട്ട് ഫലമറിഞ്ഞപ്പോൾ പൂക്കുഞ്ഞു മാത്രമല്ല, നാട്ടുകാരും ഞെട്ടി. സംസ്ഥാന സർക്കാരിന്റെ അക്ഷയ ഭാഗ്യക്കുറിയുടെ ഒന്നാംസമ്മാനമായ 70 ലക്ഷം രൂപ പൂക്കുഞ്ഞെടുത്ത AZ 907042 എന്ന ടിക്കറ്റിന്.
മൈനാഗപ്പള്ളിയിലും പരിസരങ്ങളിലും വാഹനത്തിൽ മീൻകച്ചവടം നടത്തുന്ന മൈനാഗപ്പള്ളി ഇടവനശ്ശേരി ഷാനവാസ് മൻസിലിൽ പൂക്കുഞ്ഞ് എട്ടുവർഷം മുമ്പ് ആലുംകടവ് കോർപറേഷൻ ബാങ്കിൽനിന്ന് ഭവനവായ്പ എടുത്തിരുന്നു. തിരിച്ചടവ് മുടങ്ങിയതിനെ തുടർന്ന് ഒമ്പതുലക്ഷം രൂപ ബാങ്കിൽ കുടിശ്ശികയായി. ബുധനാഴ്ച ജപ്തി നോട്ടീസ് ലഭിച്ചു. തൊട്ടുപിന്നാലെയാണ് ഒന്നാംസമ്മാനം ലഭിച്ചതായി അറിയുന്നത്. മുംതാസാണ് ഭാര്യ. വിദ്യാർഥികളായ മുനീർ, മുഹ്സിന എന്നിവർ മക്കൾ.
