ലണ്ടൻ
പ്രതിരോധക്കാരൻ ജോയൽ മാറ്റിപ് ആൻഫീൽഡിൽ ലിവർപൂളിന് ആഘോഷമാെരുക്കി. 89–-ാംമിനിറ്റിൽ മാറ്റിപ് കുറിച്ച ഗോളിൽ മുൻ ചാമ്പ്യൻമാർ അയാക്സിനെ 2–-1ന് മറികടന്നു. ആദ്യകളിയിൽ നാപോളിയോട് വമ്പൻ തോൽവി വഴങ്ങിയ ലിവർപൂളിന് ജയം അനിവാര്യമായിരുന്നു. കളി സമനിലയിലാകുമെന്ന് കരുതവേയാണ് മാറ്റിപ്പിന്റെ വിജയഗോൾ പിറന്നത്.
മുഹമ്മദ് സലായിലൂടെ ലിവർപൂളാണ് മുന്നിലെത്തിയത്. എന്നാൽ, അയാക്സ് വിട്ടുകൊടുത്തില്ല. മുഹമ്മദ് കുഡ്സിലൂടെ വൈകാതെ തിരിച്ചടിച്ചു. തിയാഗോ അൽസാൻഡ്രയും മാറ്റിപ്പുമാണ് ലിവർപൂളിനായി തിളങ്ങിയത്.
ടോട്ടനം ഹോട്സ്പറിനെ സ്പോർട്ടിങ് ലിസ്ബൺ രണ്ട് ഗോളിന് തകർത്തു. കളിയവസാനമായിരുന്നു ഗോളുകൾ. അവസാനമിനിറ്റിൽ ഡയസ് ഫെർണാണ്ടസും പരിക്കുസമയം ഗൊമെസ് ലൗറെൻസോയും ടോട്ടനത്തിന്റെ ഹൃദയം പിളർത്തി. അത്ലറ്റികോ മാഡ്രിഡും തോൽവി വഴങ്ങി. ബയേർ ലെവർകൂസെനാണ് രണ്ട് ഗോളിന് അത്ലറ്റികോയെ വീഴ്ത്തിയത്. ഇന്റർ മിലാൻ വിക്ടോറിയ പ്ലെസനെ 2–-0ന് കീഴടക്കി. എഫ്സി പോർട്ടേയെ ക്ലബ് ബ്രുജ് നാല് ഗോളിന് തരിപ്പണമാക്കി.
