തിരുവനന്തപുരം> ലഹരി ഉപഭോഗവും വിതരണവും തടയുന്ന കർശന നടപടികൾക്കായി വിവിധ സമിതികൾ രൂപീകരിക്കും. സംസ്ഥാന, ജില്ലാ, തദ്ദേശ സ്വയംഭരണ, വിദ്യാലയ തലങ്ങളിലായിരിക്കും ഇവ പ്രവർത്തിക്കുക. മുഖ്യമന്ത്രി പിണറായി വിജയന്റെ അദ്ധ്യക്ഷതയിൽ ചേർന്ന യോഗത്തിലാണ് തീരുമാനം. വിദ്യാർത്ഥികൾക്കിടയിലെ മയക്കുമരുന്ന് ഉപയോഗവും വ്യാപനവും തടയാൻ നടപ്പാക്കുന്ന കർമ്മ പദ്ധതിയുടെ തുടർ നടപടികൾ യോഗം ചർച്ച ചെയ്തു.
സംസ്ഥാനതല സമിതിയിൽ മുഖ്യമന്ത്രി അദ്ധ്യക്ഷനാകും. തദ്ദേശ സ്വയംഭരണ മന്ത്രി സഹാദ്ധ്യക്ഷനും. ധന, പൊതുവിദ്യാഭ്യാസ, ഉന്നതവിദ്യാഭ്യാസ, ആരോഗ്യ, വ്യവസായ, നിയമ, മത്സ്യബന്ധന, പട്ടികജാതി- പട്ടികവർഗ്ഗ, കായിക വകുപ്പു മന്ത്രിമാരും സെക്രട്ടറിമാരും അംഗങ്ങളാകും. ചീഫ് സെക്രട്ടറി ഏകോപിപ്പിക്കും. 22ന് സംസ്ഥാനസമിതി യോഗം ചേരും. ജില്ലാതല സമിതികളിൽ ജില്ലാ പഞ്ചായത്ത് പ്രസിഡന്റ് അദ്ധ്യക്ഷനും കളക്ടർ കൺവീനറുമായിരിക്കും. ജില്ലാ ചുമതലയുള്ള മന്ത്രിമാർ പങ്കെടുക്കും. 21ന് സമിതി യോഗം ചേരും.
തദ്ദേശതല സമിതിയിൽ തദ്ദേശ സ്വയംഭരണ സ്ഥാപനമേധാവികൾ അദ്ധ്യക്ഷരാകും. പൊലീസ്, എക്സൈസ് ഉദ്യോഗസ്ഥർ കൺവീനർമാരാകും. വിദ്യാഭ്യാസ സ്ഥാപനമേധാവികൾ, രാഷ്ട്രീയപാർട്ടി പ്രതിനിധികൾ, കുടുംബശ്രീ, വായനശാല, ക്ലബ്ബ് പ്രതിനിധികൾ തുടങ്ങീ സമിതി അംഗങ്ങളുണ്ടാകും. റസിഡന്റ്സ് അസോസിയേഷൻ ഭാരവാഹികൾ, സാമൂഹ്യ-സന്നദ്ധ പ്രവർത്തകർ എന്നിവരെയും പങ്കെടുപ്പിക്കും. പോസ്റ്റർ, ബോർഡ് എന്നിവവഴിയുള്ള പ്രചരണത്തിന് വ്യാപാരികളുടെയും സഹകരണസ്ഥാപനങ്ങളുടെയും സഹായം തേടും. വാർഡുതല സമിതിയിൽ വാർഡ് അംഗം അദ്ധ്യക്ഷനാകും. കൺവീനറായി സ്കൂൾ ഹെഡ്മാസ്റ്ററോ, മുതിർന്ന അദ്ധ്യാപകനോ നിശ്ചയിക്കും. സ്കൂൾതലത്തിൽ അദ്ധ്യാപക – രക്ഷാകർതൃ സമിതിയുടെ നേതൃത്വത്തിൽ പ്രത്യേക സംവിധാനമുണ്ടാക്കും. പഞ്ചായത്ത്, വാർഡ്, സ്കൂൾതല സമിതികൾ 28നകം രൂപീകരിക്കണമെന്ന് മുഖ്യമന്ത്രി നിർദേശിച്ചു.
ഒക്ടോബർ രണ്ടിന് വിപുലമായ പ്രചാരണം ആരംഭിക്കും. നവംബർ ഒന്നിന് എല്ലാ വിദ്യാലയങ്ങളിലും രക്ഷിതാക്കളും പൂർവ വിദ്യാർഥികളും ഉൾപ്പെടെ പങ്കെടുപ്പിച്ച് ലഹരിവിരുദ്ധ ചങ്ങല സൃഷ്ടിക്കും. പ്രതീകാത്മകമായി ലഹരി വസ്തുക്കൾ കത്തിക്കും. ബസ് സ്റ്റാന്റ്, റെയിൽവേ സ്റ്റേഷൻ, ലൈബ്രറി, ക്ലബ്ബ് എന്നിങ്ങളെ മേഖലകളിൽ ജനജാഗ്രതാ സദസ് സംഘടിപ്പിക്കും. യോഗത്തിൽ മന്ത്രിമാരായ എം ബി രാജേഷ്, ആർ ബിന്ദു, ചീഫ് സെക്രട്ടറി ഡോ. വി പി ജോയ് എന്നിവരും പങ്കെടുത്തു.
