ലഖ്നൗ
മുൻ ഇന്ത്യൻ ക്രിക്കറ്റ് താരം സുരേഷ് റെയ്ന ഐപിഎല്ലിൽനിന്ന് വിരമിച്ചു. ആഭ്യന്തര മത്സരങ്ങൾ നിർത്തി. രാജ്യാന്തര ക്രിക്കറ്റിൽനിന്ന് 2020ലാണ് ഈ മുപ്പത്തഞ്ചുകാരൻ വിരമിച്ചത്. മഹേന്ദ്രസിങ് ധോണിക്കൊപ്പമായിരുന്നു വിരമിക്കൽ. ഇന്ത്യയിലെ എല്ലാവിഭാഗം ക്രിക്കറ്റിൽനിന്നും വിരമിച്ചതോടെ റെയ്നയ്ക്ക് വിദേശ ലീഗുകളിൽ കളിക്കാൻ കഴിയും. റോഡ് സേഫ്റ്റി സീരീസ് പോലുള്ള പരമ്പരകളിലും കളിക്കാം.
‘റോഡ് സേഫ്റ്റി സീരീസ്, ദക്ഷിണാഫ്രിക്ക, ശ്രീലങ്ക, യുഎഇ എന്നിവിടങ്ങളിലെ ട്വന്റി–20 ലീഗുകൾ എന്നിവയെല്ലാം എന്നെ ബന്ധപ്പെട്ടിരുന്നു. എന്നാൽ, ഞാൻ ഇതുവരെ ഒരു തീരുമാനമെടുത്തിട്ടില്ല’– റെയ്ന പറഞ്ഞു. 2018നുശേഷം ഒന്നാംക്ലാസ് ക്രിക്കറ്റിലോ ലിസ്റ്റ് എ ക്രിക്കറ്റിലോ ഈ ഇടംകെെയൻ ബാറ്റർ കളിച്ചിട്ടില്ല. ഐപിഎല്ലിൽ അവസാനമായി കളിച്ചത് കഴിഞ്ഞവർഷം ഒക്ടോബറിൽ. ചെന്നെെ സൂപ്പർ കിങ്സിന്റെ പ്രധാന താരമായിരുന്നു. 2008 മുതൽ 2021 വരെ കളിച്ചു. ഈ വർഷം താരലേലത്തിൽ ഒരു ടീമും വാങ്ങിയില്ല. രാജ്യാന്തര ക്രിക്കറ്റിൽ മൂന്നുവിഭാഗത്തിലും സെഞ്ചുറി നേടിയ ആദ്യ ഇന്ത്യൻ താരമാണ്.
