കൊച്ചി
പ്രധാനമന്ത്രി നരേന്ദ്ര മോദി രണ്ടുദിവസത്തെ സന്ദർശനത്തിന് വ്യാഴാഴ്ച കൊച്ചിയിലെത്തും. വൈകിട്ട് നാലിന് നെടുമ്പാശേരി വിമാനത്താവളത്തിൽ എത്തുന്ന പ്രധാനമന്ത്രിക്ക് നാലരയ്ക്ക് സ്വീകരണം നൽകും. തുടർന്ന് കാലടി ആദിശങ്കരക്ഷേത്രം സന്ദർശിക്കും. ആറിന് നെടുമ്പാശേരി സിയാൽ കൺവൻഷൻ സെന്ററിൽ മെട്രോ റെയിൽ രണ്ടാംഘട്ടത്തിന്റെ നിർമാണവും പേട്ട–-എസ്എൻ ജങ്ഷൻ പാതയും ഉദ്ഘാടനം ചെയ്യും.
വൈദ്യുതീകരിച്ച ഇരട്ട റെയിൽപ്പാതയുടെയും സ്പെഷ്യൽ ട്രെയിൻ ഫ്ലാഗ് ഓഫിന്റെയും എറണാകുളം സൗത്ത്–-നോർത്ത് റെയിൽവേ സ്റ്റേഷനുകളുടെ നവീകരണത്തിന്റെയും ഉദ്ഘാടനവും നിർവഹിക്കും. മുഖ്യമന്ത്രി പിണറായി വിജയൻ, ഗവർണർ ആരിഫ് മൊഹമ്മദ് ഖാൻ, മന്ത്രിമാരായ പി രാജീവ്, ആന്റണി രാജു, മേയർ എം അനിൽകുമാർ എന്നിവരും പങ്കെടുക്കും. രാത്രി എട്ടോടെ കൊച്ചി ടാജ് ഹോട്ടലിൽ പ്രധാനമന്ത്രി ബിജെപി കോർ കമ്മിറ്റി യോഗത്തിൽ പങ്കെടുക്കും. വെള്ളി രാവിലെ ഒമ്പതിന് കൊച്ചി കപ്പൽശാലയിൽ, വിക്രാന്ത് രാജ്യത്തിന് സമർപ്പിക്കും. തുടർന്ന് നാവികസേനാ വിമാനത്താവളത്തിൽനിന്ന് പ്രത്യേക വിമാനത്തിൽ മംഗളൂരുവിലേക്ക് പോകും.
