വരന്തരപ്പിള്ളി > പാലപ്പിള്ളി പുതുക്കാട് റബർ തോട്ടത്തിൽ തുടർച്ചയായി അഞ്ചാംദിവസവും കാട്ടാനക്കൂട്ടമിറങ്ങി. ചൊവ്വാഴ്ച പകലും ഇരുപതിലേറെ കാട്ടാനകളാണ് തോട്ടത്തിൽ തമ്പടിച്ച നിലയിൽ ഉള്ളത്. ടാപ്പിങ്ങിനെത്തിയ തൊഴിലാളികൾഇവയെ കാടുകയറ്റാനുള്ള ശ്രമം നടത്തിയെങ്കിലും ആനകൾ തോട്ടത്തിൽനിന്ന് മാറാതെ നിൽക്കുകയാണ്.
രാവിലെ ആറോടെയാണ് ആനകൾതോട്ടത്തിലെത്തിയത്. കുട്ടിയാനകൾഉൾപ്പെടെയുള്ള ആനക്കൂട്ടത്തെ കണ്ട് തൊഴിലാളികൾപണിക്കിറങ്ങാതെ നിൽക്കുകയായിരുന്നു. സമീപത്തുള്ള കശുവണ്ടി തോട്ടത്തിൽ നിന്നാണ് ആനകൾ കൂട്ടത്തോടെ എത്തുന്നത്. അതിനിടെ വേപ്പൂർ, വട്ടക്കൊട്ടായി പ്രദേശത്ത് ഒറ്റയാൻഇറങ്ങി വ്യാപകമായി കൃഷി നശിപ്പിച്ചു. ചൊവ്വാഴ്ച പുലർച്ചെയിറങ്ങിയ ആന വീട്ടുപറമ്പിലെ വാഴകളും തെങ്ങും കവുങ്ങും നശിപ്പിച്ചു. വീട്ടുകാർപടക്കം പൊട്ടിച്ചാണ് ആനയെ തുരത്തിയത്.
