ന്യൂഡൽഹി > കേരളത്തിലെ എൽഡിഎഫ് സർക്കാരിനെതിരെ നടക്കുന്നതും കേന്ദ്ര ഏജൻസികളുടെ വേട്ടയാടലെന്ന് പരസ്യമായി സമ്മതിച്ച് കോൺഗ്രസ്. എഐസിസിയുടെ വേരിഫൈഡ് പേജിലാണ് ദ് ടെലഗ്രാഫ് പത്രത്തിൽ വന്ന വാർത്ത പങ്കുവെച്ച് നിലപാട് വ്യക്തമാക്കിയത്. പ്രതിപക്ഷ പാർടികൾ ഭരിക്കുന്ന സംസ്ഥാനങ്ങളിലെല്ലാം കേന്ദ്ര ഏജൻസികളെ ഉപയോഗിച്ച് ബിജെപി രാഷ്ട്രീയ പ്രതികാരം തീർക്കുകയാണെന്നും പാർടി പേജിൽ കുറിച്ചിട്ടുണ്ട്. റെയ്ഡും കള്ളത്തെളിവുമുണ്ടാക്കിയാണ് ഏജൻസികളുടെ വ്യാജ അന്വേഷണങ്ങളെന്നും ദേശീയ നേതൃത്വം വ്യക്തമാക്കി.
പതിമൂന്ന് മാസത്തിനിടെ നടത്തിയ നീക്കങ്ങളാണ് പത്രം വാർത്തയാക്കിയത്. അതേസമയം കേരളത്തിലെ എൽഎഡിഎഫ് സർക്കാരിനെ അസ്ഥിരപ്പെടുത്താൻ ബിജെപിക്കൊപ്പം ഗൂഢാലോചനയിൽ ഒളിഞ്ഞും തെളിഞ്ഞും പങ്കെടുക്കുന്ന സംസ്ഥാനത്തെ കോൺഗ്രസ് നേതൃത്വത്തിന് ദേശീയ നേതൃത്വത്തിന്റെ നിലപാട് കനത്ത തിരിച്ചടിയാണ്. സ്വർണ്ണക്കള്ളടത്തിലും, കിഫ്ബിയിലും ഇഡിയും മറ്റ് കേന്ദ്ര ഏജൻസികളും നടത്തുന്ന അന്വേഷണത്തെ പിന്തുണയ്ക്കുന്ന വിഡി സതീശനും കെ സുധാകരനുമടങ്ങുന്ന സംസ്ഥാന നേതൃത്വം ഇതൊടെ പൂർണമായും ഒറ്റപ്പെട്ടു. കേരളത്തിന് പുറമേ പഞ്ചാബ് ,ഡൽഹി ബീഹാർ, ബംഗാൾ ,ചത്തീഗ്ഗഡ്, രാജസ്ഥാൻ, ജാർഖണ്ഡ് സംസ്ഥാനങ്ങളിലും മഹാരാഷ്ട്രയിൽ ശിവസേനയ്ക്കെതിരെയും കേന്ദ്ര ഏജൻസികൾ നടത്തുന്ന നീക്കങ്ങളെയും കോൺഗ്രസ് അപലപിക്കുന്നുണ്ട്.
