ആമ്പല്ലൂർ> വീട്ടമ്മയെ ദുരൂഹ സാഹചര്യത്തിൽ കിണറ്റിൽ മരിച്ച നിലയിൽ കണ്ടെത്തി. അളഗപ്പനഗർ എരിപ്പോട് ഇല്ലിക്കൽ അനിരുദ്ധന്റെ ഭാര്യ രാധ (69) ആണ് മരിച്ചത്. വായിൽ തുണി തിരുകിയും, കൈകൾ കെട്ടിയിട്ട നിലയിലുമാണ് മൃതദേഹം. ബുധനാഴ്ച രാവിലെയാണ് വീട്ടുപറമ്പിലെ കിണറ്റിൽ മൃതദേഹം കണ്ടെത്തിയത്.
കൊച്ചുമകളോടൊപ്പം ഉറങ്ങിക്കിടന്ന രാധയെ രാവിലെ കാണാതായതിനെ തുടർന്ന് അന്വേഷിച്ചപ്പോഴാണ് വീട്ടുകാർ കിണറ്റിൽ മൃതദേഹം കണ്ടെത്തിയത്. പുതുക്കാട് നിന്നെത്തിയ അഗ്നി രക്ഷ സേന മൃതദേഹം പുറത്തെടുത്തു. ഭർത്താവും മകനും ഉൾപ്പടെ ആറ് പേർ വീട്ടിലുണ്ടായിരുന്നു.
വീടിനോട് വളരെ അടുത്തുള്ള കിണറ്റിൽ വീണുള്ള മരണം ആത്മഹത്യയാണെന്നാണ് പോലീസിന്റെ പ്രാഥമിക നിഗമനം.
കൈപ്പത്തികൾ ചേർത്തുള്ള കെട്ട് സ്വയം കെട്ടിയതാകാമെന്നാണ് പോലീസ് പറയുന്നത്. മൃതദേഹത്തിൽ പരിക്കുകൾ ഇല്ലെന്നും, സ്വന്തം അടിവസ്ത്രമാണ് മൃതദേഹത്തിന്റെ വായിൽ തിരുകിയിരിക്കുന്നതെന്നും ഡിവൈഎസ്പി സി ആർ സന്തോഷ് പറഞ്ഞു. ചാലക്കുടി ഡിവൈഎസ്പിയുടെ നേതൃത്വത്തിൽ പോലീസ് അന്വേഷണം ആരംഭിച്ചു. പുതുക്കാട് പൊലീസ് കേസ്സെടുത്തു.
