മൂലമറ്റം> കഞ്ചാവും എയർപിസ്റ്റളുമായി യുവാവിനെ പൊലീസ് പിടികൂടി. തൊടുപുഴ വെങ്ങല്ലൂർ സ്വദേശി ഇടത്തിപറമ്പിൽ അജ്മലാണ് (25) 1.100 കിലോഗ്രാം കഞ്ചാവും എയർപിസ്റ്റളുമായി പിടിയിലായത്. ഓണം സ്പെഷൽ ഡ്രൈവിന്റെ ഭാഗമായി നടത്തിയ പരിശോധനയിൽ മുട്ടം മലങ്കര അരുവിക്കുത്ത് വെള്ളച്ചാട്ടത്തിന് സമീപത്തുനിന്ന് ഞായർ പകൽ 1.30 നാണ് ഇയാളെ പിടിച്ചത്.
വാഹനത്തിലെത്തി കഞ്ചാവ് ചെറിയ പൊതികളാക്കി വിൽപ്പന നടത്തുന്നയാളാണ് പ്രതിയെന്ന് പൊലീസ് പറഞ്ഞു. ചെറിയ ഡിജിറ്റൽ ത്രാസും കഞ്ചാവ് ചൂടാക്കി വലിക്കാനുള്ള ചില്ല് കുഴലും ഒരു ബൈക്കും ഇയാളിൽനിന്ന് പിടിച്ചെടുത്തു. അജ്മലിനെതിരെ എക്സൈസിലും പൊലീസിലും കഞ്ചാവ് കേസുകൾ നിലവിലുണ്ട്. അരുവിക്കുത്ത് വെള്ളച്ചാട്ടത്തിന്റെ പരിസരങ്ങളിൽ സ്ഥിരമായി കഞ്ചാവ് മാഫിയ സംഘങ്ങൾ തമ്പടിക്കാറുണ്ടെന്ന് നാട്ടുകാരിൽനിന്ന് പരാതിയുണ്ടായിരുന്നു.
പ്രദേശം ഏതാനും നാളുകളായി പൊലീസ് നിരീക്ഷണത്തിലായിരുന്നു. മുട്ടം എസ്ഐ വി എ അസീസ്, എഎസ്ഐമാരായ ടി എം ഷംസുദ്ദീൻ, ഉണ്ണികൃഷ്ണൻ, എസ്സിപിഒ സിനാജ്, മാഹിൻ എന്നിവരുടെ നേതൃത്വത്തിലാണ് പ്രതിയെ പിടികൂടിയത്.
