ഗുരുവായൂർ> കോൺഗ്രസ് നിയോജകമണ്ഡലം കൺവെൻഷനിൽ പ്രവർത്തകർ തമ്മിൽ ഏറ്റുമുട്ടി. രാഹുൽ ഗാന്ധിയുടെ ഭാരത് ജോഡോ യാത്ര വിജയിപ്പിക്കാൻ വടക്കേക്കാട് എം ആൻഡ് ടി ഹാളിൽ ശനിയാഴ്ച ചേർന്ന നേതൃകൺവെൻഷനാണ് കൈയ്യാങ്കളിയിൽ അവസാനിച്ചത്.
ടി എൻ പ്രതാപൻ എം പി നേതൃയോഗം ഉദ്ഘാടനം ചെയ്യുന്നതിനിടയിലേക്ക് ഒരുകൂട്ടം പ്രവർത്തകർ പ്രതിഷേധ പ്രകടനവുമായി എത്തുകയായിരുന്നു. ഇതോടെ യോഗത്തിനെത്തിയവരും പ്രതിഷേധക്കാരും തമ്മിൽ വാക്കുതർക്കവും കൈയ്യാങ്കളിയുമായി.കെപിസിസി, ഡിസിസി നേതാക്കൾ, നിയോജകമണ്ഡലത്തിലെ രണ്ടുബ്ലോക്കുകളായ ഗുരുവായൂർ, വടക്കോക്കാട് ബ്ലോക്കുകളുടെ ഭാരവാഹികൾ, എക്സിക്യൂട്ടീവ് അംഗങ്ങൾ, മണ്ഡലം പ്രസിഡന്റുമാർ, ഭാരവാഹികൾ, ബൂത്ത് പ്രസിഡണ്ടുമാർ, പോഷക സംഘടനകളുടെ സംസ്ഥാന ജില്ല ബ്ലോക്ക് ഭാരവാഹികൾ, കോൺഗ്രസ്സ് ജനപ്രതിനിധികൾ, യൂത്ത് കോൺഗ്രസ്, കർഷക കോൺഗ്രസ്, സേവാദൾ, ന്യൂനപക്ഷ, ഐഎൻടിയുസി, മഹിളാ കോൺഗ്രസ്, പ്രവാസി കോൺഗ്രസ് തുടങ്ങിയ പോഷകസംഘടനകളുടെ നേതാക്കളെയും ഭാരവാഹികളെയുമാണ് യോഗത്തിന് ക്ഷണിച്ചിരുന്നത്.
എന്നാൽ കൺവൻഷനിലേക്ക് പുന്നയൂർക്കുളം, അണ്ടത്തോട് മേഖലകളിൽ നിന്നുള്ള നേതാക്കളാണ് പ്രതിഷേധവുമായി ഇരമ്പിയെത്തിയത്. പ്രതിഷേധക്കാരും യോഗത്തിലുള്ളവരും തമ്മിൽ വാക്കേറ്റും തുടർന്നതോടെ കൺവെൻഷൻ അവസാനിപ്പിക്കുന്നതായി പ്രഖ്യാപിച്ച് നേതാാക്കൾ തടിയും കൊണ്ട് രക്ഷപ്പെടുകയായിരുന്നു.
