തിരുവനന്തപുരം> ഞെട്ടിക്കുന്ന വെളിപ്പെടുത്തലെന്ന് പറഞ്ഞ് തിങ്കളാഴ്ച സ്വപ്നസുരേഷ് നടത്തിയ ‘സാറ്റ്ലൈറ്റ് ഫോൺ’ നാടക കഥകളും പൊളിഞ്ഞടുങ്ങി. യുഎഇ സർക്കാർ ഉദ്യോഗസ്ഥനായ ഗസാൻ മുഹമ്മദ് അലാവി അൽ ജെഫ്രിക് അഷാഷ്മിയെ ഭീകരനാക്കിയായിരുന്നു കഥകൾ. എന്നാൽ, നുണയും അർഥ സത്യങ്ങളും മാത്രം അടങ്ങിയതാണ് വെളിപ്പെടുത്തലുകളെന്ന് വസ്തുതകൾ തെളിയിക്കുന്നു. അതുകൊണ്ടുതന്നെ സ്വപ്നയുടെ പത്രസമ്മേളനങ്ങൾക്ക് വൻപ്രധാന്യം നൽകിയിരുന്ന മാധ്യമങ്ങളടക്കം അതിൽ നിന്ന് പിൻമാറി.
യുഎഇ പൗരൻ നെടുമ്പാശേരി വിമാനത്താവളത്തിൽ പിടിയിലായപ്പോൾ രക്ഷപ്പെടാൻ മുഖ്യമന്ത്രിയുടെ ഓഫീസ് സഹായിച്ചെന്നാണ് ആരോപണം. ഇതിൽ എവിടെയും മുഖ്യമന്ത്രിയുടെ ഓഫീസിന് ബന്ധമുണ്ടെന്ന് തെളിയിക്കാനുള്ള വസ്തുതകളില്ല. അതേസമയം, യുഎഇ യിലെ ഉയർന്ന ഉദ്യോഗസ്ഥനെതിരെ ഒരടിസ്ഥാനമില്ലാതെ ഭീകരനായി മുദ്രകുത്തുകയും ചെയ്തു.
2017 ലാണ് ഗസാൻ മുഹമ്മദ് അലാവി ഇന്ത്യയിൽ പ്രവർത്തനാനുമതിയില്ലാത്ത ഫോണുമായി പിടിയിലായത്. വസ്തുതകൾ ബോധ്യപ്പെട്ട് കോടതി എഫ്ഐആർ റദ്ദാക്കിയതിനാൽ മടങ്ങുകയും ചെയ്തു. അന്ന് നിയമസഹായം നൽകിയത് യുഡിഎഫ് സർക്കാരിന്റെ കാലത്ത് അഡ്വക്കറ്റ് ജനറലായിരുന്ന കെപി ദണ്ഡപാണിയുടെയും മകൻ അഡ്വക്കറ്റ് മില്ലു ദണ്ഡപാണിയുടെയും കമ്പനിയാണെന്ന സത്യം വെളിപ്പെടുത്തലില്ല. 2017 ജൂലൈ അഞ്ചിന് കോൺസുലേറ്റ് നൽകിയ സത്യവാങ്മൂലം എഴുതിയത് സ്വപ്ന തന്നെയാണ്. ഇദ്ദേഹത്തെ കോടതിക്ക് മുമ്പാകെ ഹാജരാക്കുമെന്നതിന്റെ ഉത്തരവാദിത്വം തങ്ങൾ ഏറ്റെടുക്കുന്നതായും അന്വേഷണത്തോട് പൂർണ്ണമായി സഹകരിക്കുമെന്നും സത്യവാങ്മൂലത്തിലുണ്ട്. പൂർണമായും കോടതിയുമായി ബന്ധെപ്പെട്ട കാര്യങ്ങൾ മാത്രമാണ് നടന്നത്.
എന്നാൽ, സുഹൃത്തിന്റെ വിവാഹത്തിന് കുടുംബ സമേതം കേരളത്തിലെത്തിയ ഗസാൻ മുഹമ്മദ് അലാവി നിരോധിത ഫോൺ കേരളത്തിൽ ഉപയോഗിച്ചിട്ടില്ലെന്ന് എഫ്ഐആർ റദ്ദാക്കി ഹൈക്കോടതി ഇറക്കിയ ഉത്തരവിൽ പറയുന്നുണ്ട്. ഫോൺ കൊണ്ടുവന്നത് യാദൃശ്ചികമായാണ്. അദ്ദേഹം എന്തെങ്കിലും കുറ്റം ചെയ്തതായി കോടതി കണ്ടെത്തിയിട്ടില്ല. തീവ്രവാദത്തിന്റെയോ രാജ്യ ദ്രോഹത്തിന്റെയോ ഒരംശവും എവിടെയും ആരോപിക്കപ്പെട്ടില്ല. വാർത്താ സമ്മേളനത്തിൽ മുഖ്യമന്ത്രിയുടെ ഓഫീസിന് എന്ത് ബന്ധമെന്ന ചോദ്യങ്ങൾക്ക് മറുപടിയുണ്ടായിരുന്നില്ല, പഠിപ്പിച്ചത് പാടുകയായിരുന്നു.
