കുന്നംകുളം> മയക്കുമരുന്ന് നൽകി യുവതിയെ ക്രൂരമായി പീഡിപ്പിച്ച സംഭവത്തിൽ ഭർത്താവ് ഉൾപ്പെടെ രണ്ടുപേരെ പൊലീസ് അറസ്റ്റ് ചെയ്തു. കുന്നംകുളം എസ് എച്ച് ഒ യു കെ ഷാജഹാന്റെ നേതൃത്വത്തിലുള്ള പോലീസ് സംഘമാണ് ഭർത്താവിനെയും സുഹൃത്ത് സൂരജിനെയും അറസ്റ്റ് ചെയ്തത്.
ചെമ്മന്തട്ടയിലെ വീട്ടിലെത്തിയ യുവതിയെ കഴിഞ്ഞ ദിവസം ബന്ധുവായ സൂരജ് മയക്കുമരുന്ന് നൽകി പീഡിപ്പിക്കുകയായിരുന്നു. ഇതേ തുടർന്ന് ചികിത്സ തേടിയ യുവതി ആശുപത്രിയിലും പിന്നീട് പോലീസിലും നൽകിയ മൊഴിയിലാണ് ഭർത്താവും തന്നെ ക്രൂരമായ രീതിയിൽ പീഡിപ്പിച്ചിരുന്നതായി യുവതി മൊഴി നൽകിയത്.
കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചിരുന്ന യുവതി കഴിഞ്ഞ ദിവസമാണ് ഡിസ്ചാർജ് ആയത്. യുവതിയുടെ നഗ്നചിത്രങ്ങളും മറ്റും നേരത്തെ ഭർത്താവ് ബന്ധുവായ സൂരജിന് അയച്ചുകൊടുത്തിരുന്നു. ഇത് കാണിച്ച് സൂരജ് യുവതിയെ ഭീഷണിപ്പെടുത്തിയിരുന്നു. പിന്നീടാണ് മയക്കുമരുന്ന് നൽകിയുള്ള പീഡനം. യുവതിയുടെ നഗ്ന ദൃശ്യങ്ങൾ മൊബൈലിൽ പകർത്തി അയച്ചു കൊടുത്തതിനാണ് ഭർത്താവിനെ അറസ്റ്റ് ചെയ്തിട്ടുള്ളത്. ഐ.ടി ആക്ട് പ്രകാരമാണ് ഇയാളെ കേസിൽ ഉൾപെടുത്തിയിരിക്കുന്നത്. മൊബൈൽ ഫോണും പെൻഡ്രൈവും പോലീസ് കസ്റ്റഡിയിൽ എടുത്തിട്ടുണ്ട്. കൂടുതൽ അന്വേഷണം നടന്നുവരികയാണ്.
