തിരുവനന്തപുരം
സംസ്ഥാനത്ത് ഒന്നാം വർഷ ഹയർ സെക്കൻഡറി, വൊക്കേഷണൽ ഹയർ സെക്കൻഡറി ക്ലാസുകളിലേക്ക് ഏകജാലകം വഴിയുള്ള പ്രവേശനത്തിന് 11 മുതൽ 18 വരെ ഓൺലൈനായി അപേക്ഷിക്കാം. മുഖ്യഘട്ടത്തിലെ അലോട്ട്മെന്റുകളുടെ എണ്ണം രണ്ടിൽ നിന്ന് മൂന്നാക്കി. നീന്തൽ അറിയാവുന്നവർക്ക് നൽകിയിരുന്ന ബോണസ് പോയിന്റ് ഒഴിവാക്കി. ട്രയൽ അലോട്ട്മെന്റ് 21ന് നടത്തും. ആദ്യ അലോട്ട്മെന്റ് 27ന് ആണ്. മുഖ്യഘട്ടത്തിലെ അവസാന അലോട്ട്മെന്റ് ആഗസ്ത് 11ന്. ആഗസ്ത് 17ന് പ്ലസ് വൺ ക്ലാസ് ആരംഭിക്കും.
മുഖ്യ ഘട്ടം കഴിഞ്ഞാൽ പുതിയ അപേക്ഷ ക്ഷണിച്ച് സപ്ലിമെന്ററി അലോട്ട്മെന്റുകളിലൂടെ ശേഷിക്കുന്ന ഒഴിവ് നികത്തും. സെപ്തംബർ 30ന് പ്രവേശന നടപടി പൂർത്തിയാക്കും.
വൊക്കേഷണൽ ഹയർ സെക്കൻഡറിയിൽ മൂന്ന് പുതിയ എൻഎസ്ക്യുഎഫ് കോഴ്സുകൾകൂടി ഉൾപ്പെടുത്തി. ഓൺലൈൻ അപേക്ഷ സമർപ്പിക്കാനും വിജ്ഞാപനം വായിക്കാനും സ്കൂളുകളും കോഴ്സുകളും മനസ്സിലാക്കാനും വെബ്സൈറ്റ്: www.admission.dge.kerala.gov.in
പ്ലസ് വൺ: 7 ജില്ലയിൽ 30 ശതമാനം സീറ്റ് വർധന
എസ്എസ്എൽസി ജയിച്ച എല്ലാ കുട്ടികൾക്കും ഹയർ സെക്കൻഡറി പഠനം ഉറപ്പാക്കാൻ ഏഴു ജില്ലയിൽ 30 ശതമാനം സീറ്റ് വർധിപ്പിച്ചു. കുട്ടികൾ കൂടുതലുള്ള തിരുവനന്തപുരം, പാലക്കാട്, കോഴിക്കോട്, മലപ്പുറം, വയനാട്, കണ്ണൂർ, കാസർകോട് ജില്ലകളിലെ എല്ലാ സർക്കാർ സ്കൂളിലുമാണ് 30 ശതമാനം മാർജിനൽ സീറ്റ് വർധിപ്പിച്ചത്. ഈ ജില്ലകളിലെ എയ്ഡഡ് സ്കൂളുകളിൽ 20 ശതമാനം സീറ്റും വർധിപ്പിച്ചു. സ്കൂളുകൾ ആവശ്യപ്പെട്ടാൽ 10 ശതമാനം സീറ്റുകൂടി വർധിപ്പിക്കും.
കൊല്ലം, എറണാകുളം, തൃശൂർ ജില്ലകളിൽ മുഴുവൻ സർക്കാർ, എയ്ഡഡ് ഹയർ സെക്കൻഡറി സ്കൂളിലും 20 ശതമാനം സീറ്റ് വർധിപ്പിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിൽ സീറ്റ് വർധന ഇല്ല. കഴിഞ്ഞ അധ്യയനവർഷം അനുവദിച്ച 75 ബാച്ചും ഷിഫ്റ്റ് ചെയ്ത നാലു ബാച്ചും ഉൾപ്പെടെ 81 താൽക്കാലിക ബാച്ച് ഈ വർഷവും തുടരും.
