ലീഡ്സ്
ടെസ്റ്റിലെ ലോകചാമ്പ്യൻമാരായ ന്യൂസിലൻഡിനെ തരിപ്പണമാക്കി ഇംഗ്ലണ്ട്. മൂന്ന് മത്സരപരമ്പര തൂത്തുവാരി. അവസാന ടെസ്റ്റിൽ ഏഴു വിക്കറ്റിന്റെ തകർപ്പൻ ജയം കുറിച്ചു. ഇംഗ്ലണ്ട് ക്യാപ്റ്റനായി ബെൻ സ്റ്റോക്സിന്റെയും, പരിശീലകനായി ബ്രണ്ടൻ മക്കല്ലത്തിന്റെയും അരങ്ങേറ്റ പരമ്പരയായിരുന്നു ഇത്. അവസാനദിനം 113 റൺ മതിയായിരുന്നു ഇംഗ്ലീഷുകാർക്ക്. ജോ റൂട്ടും (125 പന്തിൽ 86) ജോണി ബെയർസ്റ്റോയും (44 പന്തിൽ 71) 15.2 ഓവറിൽ ജയം സമ്മാനിച്ചു. സ്കോർ: ന്യൂസിലൻഡ് 329, 326 ഇംഗ്ലണ്ട് 360, 3–-296. രണ്ട് ഇന്നിങ്സിലുമായി 10 വിക്കറ്റ് നേടിയ ഇംഗ്ലണ്ട് സ്പിന്നർ ജാക്ക് ലീഷാണ് കളിയിലെ താരം. റൂട്ട് പരമ്പരയുടെ താരവുമായി. ആകെ 396 റണ്ണുണ്ട്.
ജൂലൈ ഒന്നിന് ടെസ്റ്റിൽ ഇന്ത്യയെ നേരിടാനൊരുങ്ങുന്ന ഇംഗ്ലണ്ടിന് ഈ പരമ്പര വിജയം ബലമേകും. മഴ കാരണം വൈകിയായിരുന്നു അഞ്ചാംദിനം കളി തുടങ്ങിയത്. ആദ്യ ഓവറിൽ ഒല്ലി പോപ്പിനെ (82) മടക്കി ടിം സൗത്തി ന്യൂസിലൻഡിന് പ്രതീക്ഷ നൽകി. എന്നാൽ, റൂട്ടിനൊപ്പം ഒത്തുചേർന്ന ബെയർസ്റ്റോ ആഞ്ഞടിച്ചു. മൂന്ന് സിക്സറും എട്ട് ഫോറും പായിച്ച് അനായാസം റൺ കണ്ടെത്തി. മറുവശം റൂട്ടും മോശമാക്കിയില്ല. ഒരു സിക്സും 11 ഫോറും മുൻ ക്യാപ്റ്റൻ നേടി.
ആദ്യ രണ്ട് ടെസ്റ്റിലും അഞ്ചു വിക്കറ്റിനായിരുന്നു ഇംഗ്ലണ്ടിന്റെ ജയം.
