കഞ്ഞിക്കുഴി > നഗ്നദൃശ്യങ്ങൾ പകർത്തി യുവാവിനെ ഭീഷണിപ്പെടുത്തി പണംതട്ടിയ കേസിൽ ആർഎസ്എസ് പ്രവർത്തകനും ഭാര്യയും റിമാൻഡിൽ. ആർഎസ്എസ് പ്രവർത്തകനായ മാരാരിക്കുളം തെക്ക് പഞ്ചായത്ത് മൂന്നാം വാർഡിൽ വളവനാട് ദേവസ്വംവെളി വീട്ടിൽ സുനീഷ് (31), ഭാര്യ സേതുലക്ഷ്മി എന്നിവരെയാണ് കോടതി റിമാൻഡ് ചെയ്തത്.
ഇടുക്കി തൊടുപുഴ സ്വദേശിയും പ്രവാസിയുമായിരുന്ന യുവാവിനെ പെൺകെണിയിൽ കുടുക്കിയതിന് മാരാരിക്കുളം പൊലീസാണ് അറസ്റ്റ്ചെയ്തത്. യുവാവുമായി ഫെയ്സ്ബുക്കിൽ പരിചയപ്പെട്ട സേതുലക്ഷ്മി ഭർത്താവായ സുനീഷിന്റെ സഹായത്തോടെ ഇയാളെ കണിച്ചുകുളങ്ങരയിലുളള വാടകവീട്ടിലേക്ക് വിളിച്ചുവരുത്തി. തുടർന്ന് നഗ്നദൃശ്യങ്ങൾ പകർത്തുകയും അത് കാണിച്ച് ഭീഷണിപ്പെടുത്തി എടിഎം കാർഡ്, ആധാർകാർഡ്, ഡ്രൈവിങ് ലൈസൻസ് എന്നിവ കൈക്കലാക്കി പണം കവരുകയുമായിരുന്നു. പിന്നീടും പണം വാങ്ങി.
ഇതു തുടർന്നതോടെ യുവാവ് മാരാരിക്കുളം പൊലീസിൽ പരാതി നൽകി. മാരാരിക്കുളം പൊലീസ് ഇൻസ്പെക്ടർ എസ് രാജേഷിന്റെ നേതൃത്വത്തിൽ മാരാരിക്കുളം എസ്ഐ സെസിൽ കൃസ്റ്റിൻ രാജ്, എഎസ്ഐ ജാക്സൺ, സിപിഒമാരായ ജഗദീഷ്, വിനീഷ്, മഞ്ജുള എന്നിവരുടെ സംഘമാണ് പ്രതികളെ അറസ്റ്റ് ചെയ്ത് തൊണ്ടിമുതൽ കണ്ടെടുത്തത്. അന്വേഷണത്തിൽ പ്രതികൾ മുമ്പും ഇതുപോലെ മറ്റ് പലരേയും വലയിൽ കുടുക്കിയതായാണ് വിവരം.
