തിരുവനന്തപുരം > സ്വപ്ന സുരേഷിന്റെ പുതിയ വെളിപ്പെടുത്തലുകള് എന്ന പേരില് ഇപ്പോള് പ്രചരിപ്പിക്കുന്ന നുണകള് ഇടതുപക്ഷ ജനാധിപത്യ മുന്നണിക്കും, സര്ക്കാരിനും അവമതിപ്പ് സൃഷ്ടിക്കാനുള്ള ഗൂഢാലോചനയുടെ ഭാഗമാണെന്ന് എല്ഡിഎഫ് കണ്വീനര് ഇ പി ജയരാജന് പ്രസ്താവനയില് പറഞ്ഞു.
ഇടതുപക്ഷ ജനാധിപത്യ മുന്നണിക്ക് തുടര്ഭരണം ലഭിക്കുകയും കഴിഞ്ഞ ഒരു വര്ഷക്കാലം കൊണ്ട് തന്നെ ജനങ്ങള്ക്ക് നല്കിയ വാഗ്ദാനങ്ങളില് ബഹുഭൂരിപക്ഷവും നടപ്പാക്കുന്നതിന് എല്ഡിഎഫ് സര്ക്കാര് നേതൃത്വം നല്കി വരികയുമാണ്. ഈ ഘട്ടത്തില് അത്തരം ചര്ച്ചകളില് നിന്ന് ജനശ്രദ്ധ തിരിച്ചുവിടാന് സര്ക്കാരിന് നേതൃത്വം നല്കുന്ന മുഖ്യമന്ത്രിക്കെതിരായി തന്നെ വീണ്ടും രംഗത്തിറങ്ങിയിരിക്കുകയാണ്. രഹസ്യമൊഴി രേഖപ്പെടുത്തിയ ഉടനെതന്നെ അത് മാധ്യമങ്ങളോട് വെളിപ്പെടുത്തുന്നത് രാഷ്ട്രീയ ഗൂഢാലോചനയുടെ ഭാഗമാണ്. ഇവര് തന്നെയാണ് നേരത്തെ മുഖ്യമന്ത്രിയെ കുടുക്കാന് ഇ.ഡി ഉദ്യോഗസ്ഥര് സമ്മര്ദ്ദം ചെലുത്തുന്നതായി വെളിപ്പെടുത്തിയത് എന്നതും ഓര്ക്കേണ്ടതുണ്ട്. ഇപ്പോള് നടന്നിട്ടുള്ള ഗൂഢാലോചനയുടെ പിന്നിലുള്ളവരെ പുറത്തുകൊണ്ടുവരണമെന്നും എല്ഡിഎഫ് കണ്വീനര് ഇ പി ജയരാജന് പ്രസ്താവനയില് പറഞ്ഞു.
