കോഴിക്കോട്> കര്ണാടകയിലെ മാണ്ഡ്യയില് മരിച്ച നിലയില് കണ്ടെത്തിയ കൂരാച്ചുണ്ട് സ്വദേശി ജംഷീദിന്റെ മരണത്തില് ദുരൂഹതയേറുന്നു. ശരീരത്താകെ പരിക്കുകള് കണ്ടെത്തിയിട്ടുണ്ട്. മരണകാരണം തലയ്ക്കും നെഞ്ചിനുമേറ്റ ക്ഷതമാണെന്ന് പോസ്റ്റ് മോര്ട്ടം റിപ്പോര്ട്ടില് പറയുന്നു. ട്രെയിന് തട്ടിമരിച്ചതെന്നായിരുന്നു കൂട്ടുകാരുടെ മൊഴി. എന്നാല് ഇത് വിശ്വാസയോഗ്യമല്ലെന്നും ട്രെയിന് തട്ടിയതിന്റെ ലക്ഷണങ്ങളൊന്നും മൃതദേഹത്തില് ഇല്ലെന്നും ബന്ധുക്കള് ആരോപിച്ചിരുന്നു.
ശരീരത്തില് ഗ്രീസിന്റെ അംശവും കണ്ടെത്തിയിട്ടുണ്ട്. മെയ് 11നാണ് ജംഷീദിനെ റയില്വേ ട്രാക്കില് മരിച്ച നിലയില് കണ്ടെത്തിയത്.ഒമാനില് നിന്ന് അവധിക്ക് നാട്ടിലെത്തിയ കൂരാച്ചുണ്ട് ഉള്ളിക്കാം കുഴിയില് ജംഷിദ് മെയ് ഏഴിനാണ് രണ്ട് സുഹൃത്തുക്കള്ക്കൊപ്പം ബംഗളൂരുവിലേക്ക് യാത്രപോയത്.
ബുധനാഴ്ച്ച ജംഷിദിന് അപകടം പറ്റിയെന്ന് സുഹൃത്തുക്കള് വീട്ടുകാരെ വിവരമറിയിച്ചു. തുടര്ന്ന് മാണ്ഡ്യയിലെത്തിയ ബന്ധുക്കളോട് ജംഷിദ് ട്രെയിന് തട്ടി മരിച്ചുവെന്ന് സുഹൃത്തുക്കള് അറിയിക്കുകയായിരുന്നു.
