തിരുവനന്തപുരം
മതവിദ്വേഷ പ്രസംഗ കേസിൽ ജാമ്യവ്യവസ്ഥകൾ ലംഘിച്ച് അന്വേഷണവുമായി നിസ്സഹകരിക്കുന്ന പി സി ജോർജിനെതിരെ പൊലീസ് കോടതിയെ സമീപിക്കും. ജോർജിന്റെ ജാമ്യം റദ്ദാക്കാനാവശ്യപ്പെട്ട് ഹൈക്കോടതിയെ സമീപിക്കാമെന്ന് പൊലീസിന് നിയമോപദേശം ലഭിച്ചു.
ശബ്ദപരിശോധനയ്ക്ക് ഹാജരാകണമെന്ന പൊലീസ് നിർദേശം ലംഘിച്ച ജോർജ് തൃക്കാക്കരയിൽ എൻഡിഎ പ്രചാരണത്തിൽ പങ്കെടുത്തിരുന്നു. ആരോഗ്യപ്രശ്നത്താൽ എത്താൻ കഴിയില്ലെന്നായിരുന്നു ഫോർട്ട് പൊലീസിന് ജോർജ് നൽകിയ മറുപടി. ഇത് നിസ്സഹകരണമാണെന്ന് വിലയിരുത്തിയാണ് പൊലീസ് നിയമോപദേശം തേടിയത്.
അനന്തപുരി ഹിന്ദു മഹാസമ്മേളനത്തിലെ പ്രസംഗ കേസിൽ ജാമ്യവ്യവസ്ഥ ലംഘിച്ച് ജയിലിലായിരുന്ന ജോർജിന് ഹൈക്കോടതിയാണ് വീണ്ടും വ്യവസ്ഥകളോടെ ജാമ്യം അനുവദിച്ചത്. വ്യവസ്ഥകൾ ലംഘിച്ചാൽ ഹൈക്കോടതിയെ സമീപിക്കാമെന്നും ജാമ്യഉത്തരവിലുണ്ട്.
