പാലക്കാട്> എസ്ഡിപിഐ, ആർഎസ്എസ് പ്രവർത്തകരുടെ കൊലപാതകങ്ങളെത്തുടർന്ന് പാലക്കാട് ജില്ലയിൽ നിരോധനാജ്ഞ തുടരുന്ന സാഹചര്യത്തിൽ തിങ്കൾ പകൽ 3.30 ന് സർവ കക്ഷിയോഗം ചേരും.
കലക്ടറേറ്റ് കോൺഫറൻസ് ഹാളിൽ ചേരുന്ന യോഗത്തിൽ മന്ത്രി കെ കൃഷ്ണൻകുട്ടി അധ്യക്ഷനാകും. എംഎൽഎമാർ, രാഷ്ട്രീയ പാർടി പ്രതിനിധികൾ തുടങ്ങിയവർ പങ്കെടുക്കും. യോഗവുമായി സഹകരിക്കില്ലെന്ന് ബിജെപി കഴിഞ്ഞ ദിവസം പറഞ്ഞിരുന്നെങ്കിലും തീരുമാനം മറ്റിയിട്ടുണ്ട്.
എസ്ഡിപിഎ പ്രവർത്തകൻ സുബൈർ, ആർഎസ്എസ് പ്രവർത്തകൻ ശ്രീനിവാസൻ എന്നിവരാണ് കൊല്ലപ്പെട്ടത്. ഇരു കൊലപാതകങ്ങളുടെയും അന്വേഷണത്തിന് പ്രത്യേക സംഘങ്ങളെ നിയോഗിച്ചിട്ടുണ്ട്. സുബൈർ വധക്കേസിൽ നാലുപേരാണ് പിടിയിലായത്. മുഴുവൻ പ്രതികളെയും ഉടൻ അറസ്റ്റ് ചെയ്യും. ഏഴുപേരെ ചോദ്യം ചെയ്ത് വിട്ടയച്ചു . ശ്രീനിവാസന്റെ കൊലപാതകത്തിൽ ഒമ്പതുപേരാണ് കസ്റ്റഡിയിലുള്ളത്. ഇവരെ കൂടാതെ 10 പേരെയും ചോദ്യം ചെയ്തു.
