വിവാഹമെന്നാൽ നിയമപരമായ കരാറുകൾ പാലിച്ച് ഒരുമിച്ച് ജീവിക്കാമെന്ന രണ്ട് മുതിർന്ന വ്യക്തികളുടെ തീരുമാനമാണെന്നും എന്നാൽ അതിനെ പണമിടപാടാക്കി അവഹേളിക്കാനും സ്ത്രീകളുടെ സാമൂഹിക പദവി ഇടിക്കാനുമുള്ള ശ്രമമാണ് സ്ത്രീധന സമ്പ്രദായത്തിലൂടെ നടക്കുന്നതെന്ന് മുഖ്യമന്ത്രി ഫേസ്ബുക്കിൽ കുറിച്ചു. ഈ അനാചാരം ഇന്നും നിലനിൽക്കുന്നു എന്നത് അപമാനകരമാണ്. സ്ത്രീധനത്തിനെതിരെ നിയമനടപടികൾ വ‍ര്‍ധിപ്പിക്കേണ്ടതുണ്ടെന്നും ഇതിനായി പുതിയ പരാതികൾ റിപ്പോ‍ർട്ട് ചെയ്യാനായാണ് വെബ് പോര്ട്ടൽ ആരംഭിക്കുന്നതെന്നും മുഖ്യമന്ത്രി വ്യക്തമാക്കി. http://wcd.kerala.gov.in/dowry എന്ന വെബ്സൈറ്റിലൂടെ പരാതികള്‍ രജിസ്റ്റര് ചെയ്യാം.
Also Read:
സ്ത്രീധനം വാങ്ങുന്നതിനും കൊടുക്കുന്നതിനുമെതിരെ പൊതുജനങ്ങള്‍ക്കും സംഘടനകള്‍ക്കും പുതിയ പോര്ട്ടൽ വഴി പരാതി നല്‍കാമെന്ന് മുഖ്യമന്ത്രി ലഭിച്ചു. ജില്ലാ സ്ത്രീധന നിരോധന ഓഫീസര്‍ക്കാണ് പരാതികള്‍ ലഭിക്കുക. ബന്ധപ്പെട്ട ഉദ്യോഗസ്ഥര്‍ക്ക് പരാതികള്‍ കൈമാറാനും പരാതികള്‍ തീര്‍പ്പാക്കുന്നതിൻ്റെ പുരോഗതി അറിയാനും ഈ പോര്ട്ടൽ വഴി സാധിക്കുമെന്ന് മുഖ്യമന്ത്രി വ്യക്തമാക്കി.
സ്ത്രീധന സമ്പ്രദായം തുടച്ചു നീക്കാനാണ് ഈ സംവിധാനത്തിലൂടെ ഉദ്ദേശിക്കുന്നതെന്നും സ്ത്രീധനത്തിനെതിരെ പൊരുതാൻ എല്ലാവരും മുന്നിട്ടിറങ്ങണമെന്ന് അഭ്യര്‍ഥിക്കുന്നുവെന്നും മുഖ്യമന്ത്രി പറഞ്ഞു.
പരാതി സമര്‍പ്പിക്കുന്നതും പുരോഗതി അറിയുന്നതും സംബന്ധിച്ച വിശദമായ വിവരങ്ങള്‍ പോര്‍ട്ടലിൽ ഉള്‍ക്കൊള്ളിച്ചിട്ടുണ്ട്. കൂടാതെ സ്ത്രീധന നിയമത്തെക്കുറിച്ചുള്ള വിശദമായ വിവരങ്ങളും പോര്‍ട്ടലിലുണ്ട്. സ്ത്രീധന ദുരിതബാധിതരായ സ്ത്രീകള്‍ക്കും മാതാപിതാക്കള്‍ക്കും സംഘടനകള്‍ ഉള്‍പ്പെടെയുള്ളവര്‍ക്കും പരാതികള്‍ സമര്‍പ്പിക്കാം. അടിസ്ഥാന വിവരങ്ങള്‍ നല്‍കി രജിസ്റ്റര് ചെയ്ത ശേഷമാണ് പരാതികള്‍ നല്‍കേണ്ടത്.
Also Read:
പരാതി ലഭിച്ചാൽ ഉദ്യോഗസ്ഥര്‍ ആവശ്യമായ നിയമനടപടികള്‍ സ്വീകരിക്കുകയും ആവശ്യമെങ്കിൽ പോലീസ് സഹായം അടക്കം ലഭ്യമാക്കുകയും ചെയ്യും. പരാതി ലഭിച്ച് മൂന്ന് ദിവസത്തിനുള്ളിൽ സ്ത്രീധന നിരോധന ഓഫീസറോ പ്രതിനിധിയോ പരാതിക്കാരെ ബന്ധപ്പെടുമെന്നാണ് ഉറപ്പ്.
