വിടി ബൽറാം രാജ്യസഭയിലെത്തുമോ? ആന്‍റണിക്ക് പകരമാകാൻ ചെറിയാൻ ഫിലിപ്പ്? കോൺഗ്രസിൽ ചർച്ച സജീവം

തിരുവനന്തപുരം: തീയതി പ്രഖ്യാപിച്ചതിന് പിന്നാലെയാണ് ഇനി മത്സരിക്കാനില്ലെന്ന് മുതിർന്ന കോൺഗ്രസ് നേതാവ് എകെ ആന്‍റണി പ്രഖ്യാപിച്ചത്. ഇതോടെ ആരാകും കോൺഗ്രസ് സ്ഥാനാർഥിയെന്ന ചർച്ചകൾ സജീവമായിരിക്കുകയാണ്. കേരളത്തിൽ നിന്ന് ഒഴിവുവരുന്ന മൂന്നു സീറ്റുകളിൽ തങ്ങൾക്ക് ജയിക്കാവുന്ന ഒരു സീറ്റിലേക്ക് കോൺഗ്രസ് ആരെ മത്സരിപ്പിക്കുമെന്ന് ഉറ്റുനോക്കുകയാണ് രാഷ്ട്രീയ വൃത്തങ്ങൾ.

കോൺഗ്രസിലെ മുതിർന്ന നേതാക്കൾ ഉൾപ്പെടെയുള്ളവർ രാജ്യസഭാ സീറ്റിനായി രംഗത്തുണ്ടെന്നാണ് വിവിധ മാധ്യമങ്ങൾ റിപ്പോർട്ട് ചെയ്യുന്നത്. എന്നാൽ യുവാക്കൾക്ക് അവസരം കൊടുക്കുന്ന കാര്യം പാർട്ടി ചർച്ച ചെയ്ത് തീരുമാനിക്കാനും സാധ്യതയുണ്ട്. മുന്‍ കേന്ദ്രമന്ത്രിയും കെപിസിസി പ്രസിഡന്‍റുമായിരുന്ന മുല്ലപ്പള്ളി രാമചന്ദ്രന്‍, ഇടതുബന്ധം അവസാനിപ്പിച്ച് തിരികെയെത്തിയ ചെറിയാന്‍ ഫിലിപ്പ്, മുൻ എംഎൽഎയും കെപിസിസി വൈസ് പ്രസിഡന്‍റുമായ വി ടി ബല്‍റാം തുടങ്ങിയവരുടെ പേരുകളാണ് സജീവമായി ഉയരുന്നത്.

Also Read :
നടക്കാൻ പോകുന്ന തൃക്കാക്കര ഉപതെരഞ്ഞെടുപ്പിലേക്കും വി ടി ബല്‍റാമിന്‍റെ പേര് ഉയരുന്നുണ്ട്. പി ടി തോമസിന്‍റെ ഭാര്യ ഉമാ തോമസ് മത്സരിക്കാനില്ലെങ്കില്‍ ബല്‍റാമിനെ മത്സരിപ്പിക്കണമെന്ന ആവശ്യം വിവിധ കോണുകളിൽ നിന്ന് നേരത്തെ ഉയർന്നിരുന്നു. യുവാക്കളെ തന്നെ രാജ്യസഭയിലേക്ക് അയക്കാൻ കോൺഗ്രസ് തീരുമാനിച്ചാൽ പ്രഥമ പരിഗണന ബൽറാമിന് തന്നെയാകും അല്ലെങ്കിൽ എം ലിജുവിന് അവസരം ലഭിച്ചേക്കും.

ഇടതുബന്ധം അവസാനിപ്പിച്ച് തിരികെയത്തിയ ചെറിയാൻ ഫിലിപ്പിനെ കോൺഗ്രസ് രാജ്യസഭയിലേക്ക് അയക്കുമോയെന്നത് കാത്തിരുന്ന് കാണേണ്ടതുണ്ട്. ചെറിയാൻ ഫിലിപ്പിനും മുല്ലപ്പള്ളിയ്ക്കും പുറമെ കെവി തോമസ്, വിഎം സുധീരൻ എന്നീ പേരുകളും ചർച്ചയിൽ വന്നേക്കും.

അതേസമയം വർഷങ്ങളായി യുഡിഎഫിൽ തുടർന്നിട്ടും പാർലമെന്‍ററി അവസരങ്ങൾ ലഭിക്കാത്ത സിഎംപി ജനറൽ സെക്രട്ടറി സി പി ജോണിനെ രാജ്യസഭയിലേക്ക് പരിഗണിക്കണമെന്ന ആവശ്യവും യുഡിഎഫിലുണ്ട്. എന്നാൽ കോൺഗ്രസ് തങ്ങളുടെ സീറ്റ് സിഎംപിയ്ക്ക് നൽകുമോയെന്ന് കണ്ടറിയേണ്ടതുണ്ട്. വരും ദിവസങ്ങളിലാകും കോൺഗ്രസ് സ്ഥാനാർഥിയെ സംബന്ധിച്ച് അന്തിമ തീരുമാനത്തിലെത്തുക.

Also Read :
തെരഞ്ഞെടുപ്പ് പ്രഖ്യാപിച്ചതിന് പിന്നാലെ ഇനി രാജ്യസഭയിലേക്ക് മത്സരിക്കാനില്ലെന്ന് കോണ്‍ഗ്രസ് നേതാവ് എ കെ ആന്‍റണി ഹൈക്കമാന്‍ഡിനെ തന്നെ അറിയിക്കുകയായിരുന്നു. ഇതുവരെ നല്‍കിയ അവസരങ്ങള്‍ക്ക് കോണ്‍ഗ്രസ് അധ്യക്ഷ സോണിയ ഗാന്ധിയോട് നന്ദിയുണ്ടെന്നും ആന്‍റണി അറിയിച്ചു. കേരളം അടക്കമുള്ള ആറ് സംസ്ഥാനങ്ങളിലെ രാജ്യസഭാ തെരഞ്ഞെടുപ്പ് മാർച്ച് 31നാണ് നടക്കുക.

കേരളത്തിലേ മൂന്ന് സീറ്റുകൾക്ക് പുറമെ പഞ്ചാബ് (5), അസം (2), ഹിമാചൽപ്രദേശ് (1), ത്രിപുര (1), നാഗാലാൻഡ് (1) എന്നിങ്ങനെയാണ് വിവിധ സംസ്ഥാനങ്ങളിൽ ഒഴിവുവരുന്ന സീറ്റുകൾ. രാജ്യസഭാ പ്രതിപക്ഷ ഉപനേതാവ് ആനന്ദ് ശർമ ഉൾപ്പെടെയുള്ളവരുടെ സീറ്റുകൾ ഇതിൽ ഉൾപ്പെടുന്നുണ്ട്. കേരളത്തിൽ നിന്ന് എ കെ ആൻറണി, എം വി ശ്രേയാംസ്കുമാർ , കെ സോമപ്രസാദ് എന്നിവരുടെ കാലാവധിയാണ് അവസാനിക്കുന്നത്.