ഉപഭോക്താക്കൾക്ക് വിലക്കിഴിവുകൾ വാഗ്ദാനം ചെയ്യുന്നതിനുള്ള ക്രിയാത്മകമായ പല പ്ലാനുകളും പദ്ധതികളും ഹോട്ടലുകൾക്കുണ്ട്. ഉദാഹരണത്തിന് നവംബറിൽ ജനിച്ചവർക്കൊക്കെ നവംബർ മാസത്തിൽ ഹോട്ടലിൽ നിന്നും ഭക്ഷണം കഴിക്കുമ്പോൾ പ്രത്യേക ഡിസ്‌കൗണ്ട്, ഇന്ന പേരുള്ള വ്യക്തിയ്ക്ക് ഒരു ദിവസം സ്പെഷ്യൽ ഡിസ്‌കൗണ്ട്, മതേർസ് ഡേയ്ക്ക് അമ്മയുമായി ഹോട്ടലിൽ നിന്നും ഭക്ഷണം കഴിക്കുന്നവർക്ക് ഡിസ്‌കൗണ്ട് എന്നിങ്ങനെ. എന്നാൽ ഹൈദരാബാദിലെ ദക്ഷിൺ 5 എന്ന് പേരുള്ള ഹോട്ടൽ ശ്രദ്ധ നേടുന്നത് വെറൈറ്റിയായ ഡിസ്‌കൗണ്ട് ഓഫറിലൂടെയാണ്‌.
ഭക്ഷണം കഴിക്കാനെത്തുന്നവരിൽ നല്ല പെരുമാറ്റം പ്രോത്സാഹിപ്പിക്കുക എന്ന ലക്ഷ്യത്തോടെ മര്യാദ ഡിസ്‌കൗണ്ട് (courtesy discounts) ആണ് ദക്ഷിൺ 5 ഒരുക്കിയിരിക്കുന്നത്. വിലക്കുറവിൽ ഭക്ഷണം ലഭിക്കാൻ സന്ദർശകർ ചെയ്യേണ്ടതെന്തെന്നോ? വെയ്റ്ററോട് വിഭവങ്ങൾ ഓർഡർ ചെയ്യുമ്പോൾ ഒപ്പം താങ്ക് യു, പ്ളീസ്, ഗുഡ് ആഫ്റ്റർനൂൺ തുടങ്ങിയ വാക്കുകൾ ഉപയോഗിക്കണം. അതായത് ഒരു ചിക്കൻ ബിരിയാണി വേണമെങ്കിൽ, വൈറ്ററോട് ‘ഒരു ചിക്കൻ ബിരിയാണി പ്ളീസ്’ എന്ന് പറയണം. ഭക്ഷണം മേശയിലെത്തുമ്പോഴും ഭക്ഷണം കഴിച്ചു കഴിഞ്ഞു പുറത്തേക്ക് പോകുമ്പോഴും സേവനത്തിന് വിളമ്പിയ വ്യക്തിയോട് താങ്ക്സ് പറയണം.
ദക്ഷിൺ 5ൽ ഒരു ഫുൾ പ്ലേറ്റ് സദ്യയ്ക്ക് (താലി) 165 രൂപയാണ് വില. അതെ സമയം ‘ഒരു താലി പ്ലീസ്’ എന്ന് പറഞ്ഞ് ഓർഡർ ചെയ്താൽ, യഥാർത്ഥ വിലയിൽ നിന്ന് 15 രൂപ കുറയ്ക്കും. അതെ സമയം ഉപഭോക്താവ് വെയിറ്ററോട് ‘ഗുഡ് ആഫ്റ്റർനൂൺ, ഒരു താലി പ്ലീസ്’ എന്ന് പറഞ്ഞാൽ 15 രൂപ കൂടി കുറയും.
“സാധാരണ മര്യാദയോടുള്ള പെരുമാറ്റം അസ്വാഭാവികമായി മാറിയിരിക്കുന്നു. പക്ഷേ, ദക്ഷിൺ-5 ഈ സ്ഥിതിക്ക് ഒരു വ്യത്യാസം വരുത്താൻ ആഗ്രഹിക്കുന്നു. ഈ റെസ്റ്റോറന്റിലേക്ക് വരിക, സന്തോഷത്തോടെ നന്ദി പറയൂ, ഒരു നല്ല ദിവസം ആശംസിക്കുന്നു, നിങ്ങളുടെ ഓർഡർ നൽകൂ, ഡിസ്കൗണ്ടുകൾ നേടൂ,” ഹൈദരാബാദ് ആസ്ഥാനമായുള്ള പബ്ലിക് റിലേഷൻസ് കൺസൾട്ടന്റായ ഡി.രാംചന്ദ്രമാണ് ഓഫർ വിശദീകരിക്കുന്ന വീഡിയോ സഹിതം ട്വിറ്ററിൽ കുറിച്ചിട്ടുണ്ട്.
