ജനത്തിന്റെ ജീവനും സ്വത്തിനും സംരക്ഷണം നൽകുന്നതിൽ മുഖ്യമന്ത്രി പരാജയപ്പെട്ടെന്നുള്ള പ്രതിപക്ഷത്തിന്റെ ആരോപണത്തിന് മറുപടി പറയുകയായിരുന്നു പിണറായി വിജയൻ. മുഖ്യമന്ത്രിയുടെ മൂക്കിനു താഴെ ഗുണ്ടകൾ അഴിഞ്ഞാടുകയാണ്. ഓരോ സംഭവം നടക്കുമ്പോഴും അത് ഒറ്റപ്പെട്ട സംഭവമാണെന്നാണ് മുഖ്യമന്ത്രി പറയുന്നത്. പോലീസിനെ നിയന്ത്രിക്കുന്നത് പാർട്ടി നേതാക്കളാണെന്നും പ്രതിപക്ഷ നേതാവ് ആരോപിച്ചു.
എന്നാൽ മുൻ യുഡിഎഫ് സർക്കാരിന്റെ കാലത്ത് 1677 കൊലക്കേസുകൾ ഉണ്ടായതായി മുഖ്യമന്ത്രി സഭയെ അറിയിച്ചു. ഒന്നാം പിണറായി സർക്കാരിന്റെ കാലത്ത് 1516 കൊലപാതക കേസുകളാണ് റിപ്പോർട്ട് ചെയ്തത്. 2016-2021 വരെ സ്ത്രീകൾക്കെതിരെയുള്ള 86390 അതിക്രമ കേസുകളും റിപ്പോർട്ട് ചെയ്തിട്ടുണ്ട്. എല്ലാ പ്രതികൾക്കുമെതിരെ നിയമ നടപടി സ്വീകരിച്ചിട്ടുണ്ടെന്ന് മുഖ്യമന്ത്രി വ്യക്തമാക്കി.
സിപിഎം പ്രവർത്തകൻ ഹരിദാസിനെ കൊലപ്പെടുത്തിയ കേസിൽ അന്വേഷണം ഊർജ്ജിതമാണെെന്ന് മുഖ്യമന്ത്രി വ്യക്തമാക്കി. കണ്ണൂരിൽ വിവാഹ ആഘോഷത്തിനിടെയുണ്ടായ ബോംബേറിൽ ഒരാൾ കൊല്ലപ്പെട്ട സംഭവത്തിൽ എല്ലാ പ്രതികളും അറസ്റ്റിലായി. കിഴക്കമ്പലത്തെ ദീപുവിന്റെ കൊലപാതകവുമായി ബന്ധപ്പെട്ട എല്ലാവരേയും അറസ്റ്റ് ചെയ്തിട്ടുണ്ടെന്ന് മുഖ്യമന്ത്രി അറിയിച്ചു.
അക്രമം നടത്താൻ പരസ്യമായി ആഹ്വാനം ചെയ്യുന്ന നേതൃത്വമാണ് കോൺഗ്രസിന്റേത്. ധീരജിന്റെ കൊലപാതകം കോൺഗ്രസ് ന്യായീകരിച്ചു. കൊലപാതകങ്ങൾക്ക് കോൺഗ്രസ് പരസ്യമായി പിന്തുണ നൽകുന്നുണ്ടെന്നും മുഖ്യമന്ത്രി കുറ്റപ്പെടുത്തി.
