പുതിയ അണക്കെട്ട് എന്നുള്ളത് സുപ്രീം കോടതി ഉത്തരവിന് വിരുദ്ധമാണെന്ന് തമിഴ്നാട് ജലവിഭവ വകുപ്പ് വ്യക്തമാക്കിയതായി വിവിധ മാധ്യമങ്ങൾ റിപ്പോർട്ട് ചെയ്തു. യാതൊരുവിധ ചർച്ചകളും കൂടിയാലോചനകളും ഇല്ലാതെയുള്ള ഗവർണറുടെ പ്രഖ്യാപനം ശരിയല്ലെന്ന നിലപാടിലാണ് തമിഴ്നാട്.
ഭരണഘടനാ ബെഞ്ചിൻ്റെ വിധി പുനഃപരിശോധിക്കണമെന്ന കേരളത്തിൻ്റെ ആവശ്യത്തിന് പിന്നാലെയാണ് തമിഴ്നാടിൻ്റെ പ്രതികരണം. പുതിയ അണക്കെട്ടെന്ന നിർദേശത്തെ എതിർക്കുന്ന നിലപാട് തുടരുകയാണ് തമിഴ്നാട്. കേരളത്തിന് സുരക്ഷ, തമിഴ്നാടിന് വെള്ളം എന്ന കേരളത്തിൻ്റെ നിർദേശത്തെ തമിഴ്നാട് എതിർക്കുകയാണ്.
മുല്ലപ്പെരിയാർ അണക്കെട്ടിലെ ജലനിരപ്പ് 142 അടിവരെയായി ഉയർത്താൻ അനുവദിക്കുന്ന ഭരണഘടന ബെഞ്ചിൻ്റെ വിധി സുപ്രീം കോടതിയുടെ വിശാല ബെഞ്ച് പുനഃപരിശോധിക്കണമെന്ന് ആവശ്യപ്പെട്ടിരുന്നു. സുപ്രീം കോടതിയിൽ എഴുതി നൽകിയ വാദത്തിലാണ് കേരളം ഈ ആവശ്യം ഉന്നയിച്ചത്. പുതിയ അണക്കെട്ട് നിർമ്മിക്കുകയാണ് മുല്ലപ്പെരിയാർ വിഷയത്തിൻ്റെ ശാശ്വത പരിഹാരമെന്ന് കേരളം സുപ്രീം കോടതിയെ അറിയിക്കുകയും ചെയ്തു.
126 വർഷം പഴക്കമുള്ള അണക്കെട്ടാണ് മുല്ലപ്പെരിയാറിലുള്ളത്. പരിസ്ഥിതി പ്രശ്നങ്ങൾ തുടരുന്ന ഈ കാലഘട്ടത്തിൽ അണക്കെട്ട് എത്ര ബലപ്പെടുത്തിയാലും സുരക്ഷിതമാകില്ല. അതിനാൽ 2014ലെ വിധി സമഗ്രമായ പുനഃപരിശോധനയ്ക്ക് വിധേയമാക്കണമെന്നും കേരളം സുപ്രീം കോടതിയിൽ ആവശ്യപ്പെട്ടു.
