ഫെബ്രുവരി 21ന് സംസ്ഥാനത്ത് ഓൺലൈൻ ക്ലാസുകള്‍ അവസാനിപ്പിക്കാനാണ് തീരുമാനം. എന്നാൽ താത്പര്യമുള്ള അധ്യാപകര്‍ക്ക് ഓൺലൈൻ ക്ലാസുകള്‍ തുടരാം. ഭിന്നശേഷിക്കാർ ഉൾപ്പെടെ സ്കൂലിലെത്താൻ ബുദ്ധിമുട്ട് നേരിടുന്ന വിദ്യാർഥികൾക്കായാണ് ഈ സൌകര്യം. മാര്‍ച്ച് 31നു മുൻപായി പാഠഭാഗങ്ങള്‍ പൂര്‍ണമായും തീര്‍ക്കാനാണ് നിര്‍ദേശം. മാര്‍ച്ച് മാസത്തോടെ തന്നെ ശനിയാഴ്ചകള്‍ പ്രവൃത്തിദിവസമാക്കിയുള്ള അധ്യയനവും അവസാനിപ്പിക്കും.
അതേസമയം, പരീക്ഷാ നടത്തിപ്പ് അടക്കമുള്ള കാര്യങ്ങള്‍ ചര്‍ച്ച ചെയ്യാൻ ഫെബ്രുവരി 21നു മുൻപായി വീണ്ടും ബന്ധപ്പെട്ട കക്ഷികളുമായി യോഗം ചേരാനാണ് സര്‍ക്കാര്‍ നീക്കം. ശേഷിക്കുന്ന പാഠഭാഗങ്ങള്‍ തീര്‍ക്കുന്നതു സംബന്ധിച്ചും ചര്‍ച്ചകള്‍ നടക്കും.
Also Read:
കഴിഞ്ഞ തിങ്കളാഴ്ച മുതലാണ് സംസ്ഥാനത്ത് ഒന്നു മുതൽ ഒൻപതു വരെ ക്ലാസുകളും നഴ്സറി ക്ലാസുകളും ഓഫ്‍ലൈൻ സംവിധാനത്തിലേയ്ക്ക് മാറിയത്. കൊവിഡ് 19 സാഹചര്യം മെച്ചപ്പെട്ടതിനാൽ സര്‍ക്കാര്‍ കൂടുതൽ ഇളവുകള്‍ നല്‍കിയതിൻ്റെ ഭാഗമായാണ് സ്കൂളുകളും തുറന്നത്. പത്ത് മുതൽ പന്ത്രണ്ട് വരെയുള്ള ക്ലാസുകളും ഉന്നതവിദ്യാഭ്യാസ സ്ഥാപനങ്ങളും നേരത്തെ തന്നെ തുറന്നിരുന്നു. എന്നാൽ സ്കൂളുകള്‍ തുറക്കുന്ന കാര്യത്തിൽ സര്‍ക്കാര്‍ കൂടിയാലോചന നടത്തിയില്ലെന്നാണ് അധ്യാപക സംഘടനകളുടെ പരാതി.
Also Read:
സ്കൂളുകള്‍ തുറന്നു പ്രവര്‍ത്തനം ആരംഭിക്കാനുള്ള നീക്കത്തോടു സഹകരിക്കാമെന്ന് അധ്യാപക സംഘടനകള്‍ ഇന്നത്ത യോഗത്തിൽ അറിയിച്ചിട്ടുണ്ട്. ശനിയാഴ്ചകളിൽ ക്ലാസുകള്‍ നടത്തേണ്ടി വന്നത് നിലവിലെ പ്രത്യേക സാഹചര്യത്തിലാണെന്നും എന്നാൽ ഇക്കാര്യത്തിൽ അഭിപ്രായവും വിമര്‍ശനവും അറിയിച്ച അധ്യാപകര്‍ക്കെതിരെ നടപടിയുണ്ടാകില്ലെന്നും മന്ത്രി ഉറപ്പു നൽകിയിട്ടുണ്ട്.
